საქართველოს ადვოკატთა ასოციაცია რეგიონში ყოველთვის იყო დარგის ჰაბი, - ამის შესახებ ტელეკომპანია „მაესტროს“ ეთერში, გადაცემა Business Insider Georgia-ში სტუმრობისას, ადვოკატთა ასოციაციის თავმჯდომარემ, ირაკლი ყანდაშვილი განაცხადა. ორგანიზაციის ხელმძღვანელი აცხადებს, რომ აქტიურად მიმდინარეობს პარტნიორობის გაფართოება როგორც რეგიონულ, ისე ევროპულ დონეზე, მათ შორის აზერბაიჯანთან და სომხეთთან გაფორმებული მემორანდუმებითა და საერთაშორისო პროფესიულ პლატფორმებში მონაწილეობით, რაც ირაკლი ყანდაშვილის თქმით, პროფესიის განვითარებასა და ევროპულ სტანდარტებთან დაახლოებას უწყობს ხელს.
„ეს ნიშა ამ შემთხვევაში მეორეხარისხოვანი არ არის. ამ მიმართულებით მე ძალიან აქტიურად ვარ ჩართული, მათ შორის რეგიონული კუთხით. აზერბაიჯანის რესპუბლიკაში მქონდა ძალიან მნიშვნელოვანი აქტივობა და შეხვედრა პროფესიული გაერთიანების პირველ პირთან, სადაც თანამშრომლობის მემორანდუმი გავაფორმეთ. შაბათ-კვირას სომხეთის პროფესიული გაერთიანების პირველ პირთან, ერევანში, თანამშრომლობის მემორანდუმს ვაწერთ ხელს. გვქონდა ძალიან მნიშვნელოვანი ვიზიტი თურქეთში - თურქეთი უდიდესი მეზობელია, სტრატეგიული პარტნიორი და, მათ შორის, საადვოკატო მიმართულებით ძალიან დიდ როლს თამაშობს რეგიონში. ასევე, პირველი გასვლითი ვიზიტი ევროპაში გვქონდა - ვენაში გაიმართა ევროპის ადვოკატთა ასოციაციის თავმჯდომარეების შეხვედრა, სადაც საქართველოს ადვოკატთა ასოციაცია ყოველთვის დაფასებული და მიღებული წევრია. კიდევ ერთხელ გაესვა ხაზი ჩვენს სწორ ჩართულობას იმ ევროპული ღირებულებების მიმართულებით, რომლებიც, მათ შორის, ადვოკატის პროფესიაშიც არის დანერგილი და ყოველდღიურად ხორციელდება საქართველოში. ეს არის ძირითადი მიმართულებები და პრიორიტეტები, თუ შეიძლება ასე ითქვას, რომლებიც მომდევნო ოთხი წლის განმავლობაში ყოველდღიურად უკვე რეალიზდება და ამ მიმართულებით ნაბიჯებს ვდგამთ.
და კიდევ ერთი ნიუანსი: საკანონმდებლო ჩარჩოსა და რეგულაციების დახვეწა და შექმნა, რაც ადვოკატის, მათ შორის, სოციალური უზრუნველყოფის პაკეტის გასაუმჯობესებლად იქნება გადადგმული, ასევე საგადასახადო სტანდარტების სწორად რეგულირება ადვოკატის საქმიანობასთან დაკავშირებით - ესეც ერთ-ერთი მნიშვნელოვანი პრიორიტეტია, რაზეც ჩვენ ყოველდღიურად ვფიქრობთ და ვმუშაობთ“, - განმარტა  ირაკლი ყანდაშვილმა.