საქართველოს ენერგეტიკულ ბალანსში განახლებადი ენერგიის წილის გაზრდა ენერგოპოლიტიკის პრიორიტეტია - ინგა ფხალაძე
"საკვანძო რეგიონული დერეფნების გზაჯვარედინზე მდებარე საქართველო მრავალი წლის განმავლობაში ენერგორესურსების უსაფრთხო ტრანზიტს უწყვეტად უწყობს ხელს. დღეს, როდესაც გლობალური და ევროპული ენერგეტიკული სისტემები ღრმა ტრანსფორმაციას განიცდის, ჩვენ სულ უფრო მეტად ვართ დაინტერესებულები სუფთა ენერგიის განვითარებით, ელექტროენერგიის ურთიერთდაკავშირებულობითა და რეგიონულ და ევროპულ ბაზრებთან უფრო ღრმა ინტეგრაციით," - განაცხადა ეკონომიკისა და მდგრადი განვითარების მინისტრის მოადგილე ინგა ფხალაძემ საერთაშორისო ენერგეტიკულ კონფერენციაში „Energy Week Black Sea 2026" სიტყვით გამოსვლისას. საერთაშორისო ფორუმი რუმინეთის ქალაქ ბუქარეტში გაიმართა.
საპანელო დისკუსიის ფარგლებში მინისტრის მოადგილემ ხაზი გაუსვა საქართველოს სტრატეგიულ როლს რეგიონის ენერგოუსაფრთხოების უზრუნველყოფისა და სუფთა ენერგიის განვითარებაში. მან ყურადღება გაამახვილა შავი ზღვის რეგიონის უნიკალურ მდებარეობაზე ევროპის, კავკასიისა და ცენტრალური აზიის დამაკავშირებელ სივრცეში. ინგა ფხალაძემ მიმოიხილა საქართველოს ენერგეტიკის სექტორის პოტენციალი და ყურადღება გაამახვილა განახლებადი ენერგიის წყაროებზე. მისი თქმით, საქართველო ახორციელებს პროექტებს ჰიდროენერგეტიკის, მზის და ქარის რესურსების ასათვისებლად და ქვეყნის ენერგეტიკულ ბალანსში განახლებადი ენერგიის წილის გაზრდა ენერგოპოლიტიკის პრიორიტეტია.
ინგა ფხალაძემ ვრცლად ისაუბრა შავი ზღვის წყალქვეშა კაბელის და „მწვანე ენერგეტიკული დერეფნის" პროექტების მიმდინარეობის და მათი არამარტო საქართველოსთვის, არამედ ევროპის ენერგოუსაფრთხოების კუთხით მნიშვნელოვანი როლის თაობაზე. მან ხაზი გაუსვა შავი ზღვის წყალქვეშა კაბელის პროექტის რეგიონალურ მნიშვნელობას და დაადასტურა რეგიონის ქვეყნებთან, ევროკავშირთან და საერთაშორისო პარტნიორებთან საქართველოს თანამშრომლობის მზაობა. ინგა ფხალაძის განმარტებით, ორი პროექტი, პარალელურ რეჟიმში მიმდინარეობს. 2025 წლის დეკემბერში შავი ზღვის წყალქვეშა კაბელის პროექტს მიენიჭა ევროკავშირის ორმხრივი ინტერესის მქონე პროექტების (PMI) სტატუსი.
ვიზიტის ფარგლებში, მინისტრის მოადგილემ შეხვედრა გამართა რუმინეთის ენერგეტიკის სახელმწიფო მინისტრ პაველ-კასიან ნიტულესკუთან, რომლის დროსაც მხარეებმა განიხილეს შავი ზღვის წყალქვეშა კაბელის და „მწვანე ენერგეტიკული დერეფნის" პროექტების მიმდინარეობა და თანამშრომლობის სამომავლო პერსპექტივები.
გარდა ამისა, ინგა ფხალაძე დაესწრო საქართველოს სახელმწიფო ელექტროსისტემამ (GSE) და რუმინეთის ეროვნული ელექტროენერგიის გადაცემის კომპანია Transelectrica S.A.-ს შორის ურთიერთგაგების მემორანდუმის ხელმოწერას შავი ზღვის წყალქვეშა კაბელის პროექტის განვითარების მიზნით თანამშრომლობასთან დაკავშირებით.
ენერგეტიკულ ფორუმს საქართველოდან ასევე დაესწრნენ ენერგეტიკისა და წყალმომარაგების მარეგულირებელი ეროვნული კომისიის თავმჯდომარე დავით ნარმანია და სს „საქართველოს სახელმწიფო ელექტროსისტემის" გენერალური დირექტორი ვანო ზარდიაშვილი.
დღის ტოპ 10 სიახლე
სხვა სიახლეები
ეროვნული ბანკის აღმასრულებელი დირექტორი ბექა დოჭვირი, ივანე ჯავახიშვილის 150 წლის იუბილესადმი მიძღვნილი კვირეულის ფარგლებში, თსუ-ში გამართულ ღონისძიებას დაესწრო
30.04.2026.17:13
ეროვნული ბანკის აღმასრულებელი დირექტორი ბექა დოჭვირი, ივანე ჯავახიშვილის 150 წლის იუბილესადმი მიძღვნილი კვირეულის ფარგლებში, თსუ-ში გამართულ ღონისძიებას დაესწრო.
ღონისძიებაზე ბექა დოჭვირმა დიდი ქართველი მეცნიერისა და საზოგადო მოღვაწის, თბილისის სახელმწიფო უნივერსიტეტი - ს დამაარსებლის, ივანე ჯავახიშვილის 150 წლის იუბილესთან დაკავშირებით სებ-ის საკოლექციო მონეტის გამოშვება ოფიციალურად დააანონსა.
„გვჯერა, რომ ახალი საკოლექციო მონეტის გამოშვება ივანე ჯავახიშვილის მდიდარი მემკვიდრეობის წარმოჩენასა და პოპულარიზაციაში მცირე წვლილს შეიტანს. ეს მონეტა იქცევა იმ ინტელექტუალური და სამეცნიერო პროგრესის სიმბოლოდ, რომელსაც ივანე ჯავახიშვილმა ჩაუყარა საფუძველი“, - აღნიშნა ბექა დოჭვირმა.
მისივე განმარტებით, ეროვნული ბანკი ლარის შემოღებიდან დღემდე არაერთ საკოლექციო მონეტას გამოსცემს, რაც ქვეყნის ისტორიის მნიშვნელოვან მოვლენებსა და თარიღებს ასახავს, მათ შორის - სახელმწიფოებრიობის 3 000 წლის იუბილეს, დამოუკიდებლობის აღდგენის 100 წლისთავს, პირველი ქართული კონსტიტუციის 100 წელს, „საქართველოს მეფეების“ სერიას, თბილისის სახელმწიფო უნივერსიტეტის 100 წლის იუბილესა და ლარის მიმოქცევაში შესვლის 30 წელს.
ბექა დოჭვირის თქმით, ასეთი პროექტები ეროვნული ვალუტის პოპულარიზაციას უწყობს ხელს.
ღონისძიება თსუ-ის რექტორმა, აკადემიკოსმა ჯაბა სამუშიამ გახსნა, რომელმაც დამსწრე საზოგადოებას სიტყვით მიმართა და იუბილეს მნიშვნელობაზე ისაუბრა. მან ივანე ჯავახიშვილის მიერ ქართული მეცნიერებისა და უმაღლესი განათლების განვითარებაში შეტანილ ფუნდამენტურ წვლილზე გაამახვილა ყურადღება.
