საქართველოს მთავრობამ განიხილა და მოიწონა „2026 წლის რთვლის ორგანიზებულად ჩატარებისათვის განსახორციელებელი ღონისძიებების შესახებ“ განკარგულების პროექტი
საქართველოს მთავრობამ განიხილა და მოიწონა „2026 წლის რთვლის ორგანიზებულად ჩატარებისათვის განსახორციელებელი ღონისძიებების შესახებ“ განკარგულების პროექტი.
გარემოს დაცვისა და სოფლის მეურნეობის სამინისტროს ინფორმაციით, „2026 წლის რთვლის ორგანიზებულად ჩატარებისათვის განსახორციელებელი ღონისძიებების შესახებ“ საქართველოს მთავრობის განკარგულების პროექტის მიზანია 2026 წლის რთვლის პროცესში მევენახეების მიერ მიღებული ყურძნის მოსავლის რეალიზაციის ხელშეწყობა და რთვლის ორგანიზებულად წარმართვა.
2026 წლის რთვლის დროს, ჭარბი მოსავლის შემთხვევაში, თუ კერძო სექტორი არ გამოხატავს ყურძნის შესყიდვის ინტერესს, სახელმწიფოს მხრიდან 1 კგ ყურძნის შესასყიდად განისაზღვრა ხარისხის მიხედვით დიფერენცირებული შემდეგი ფასები: ,,ვაზისა და ღვინის შესახებ“ საქართველოს კანონით ნებადართული ვაზის ჯიშებისგან მოწეული ყურძენი: შაქრიანობა აღემატება 20%-ს - 1,30 ლარი; შაქრიანობა 17%-დან-20%-მდე - 80 თეთრი, შაქრიანობა არ აღემატება 17-%-ს - 30 თეთრი; რაც შეეხება საფერავს: შაქრიანობა აღემატება 22%-ს - 1,50 ლარი, შაქრიანობა 17%-დან - 22%-მდე - 90 თეთრი, შაქრიანობა არ აღემატება 17-%-ს - 30 თეთრი.
რაჭის რეგიონში, რთვლის პროცესში კერძო სექტორის ჩართულობის სტიმულირების და მოსავლის ორგანიზებულად დაბინავების მიზნით, პროექტი ასევე ითვალისწინებს ყურძნის სუბსიდირებას: სუბსიდიას მიიღებს ყველა ის კომპანია, რომელიც „ხვანჭკარას“ მიკროზონაში მოწეულ 1 კგ ალექსანდროულის ან/და მუჯურეთულის ჯიშის ყურძნის სანაცვლოდ, მევენახეს არანაკლებ 8 ლარს გადაუხდის. სახელმწიფო სუბსიდიის ოდენობა, რომელსაც რაჭა-ლეჩხუმის რეგიონში ღვინის კომპანიები მიიღებენ, შეადგენს 4 ლარს, როგორც 1 კგ ალექსანდროულის, ასევე, 1 კგ მუჯურეთულის ჯიშის ყურძენზე.
ყურძნის მოსავლის ორგანიზებულად დაბინავების მიზნით, შეიქნება რთვლის საკოორდინაციო შტაბი, რომელიც 24 საათიანი რეჟიმით იმუშავებს.
დღის ტოპ 10 სიახლე
სხვა სიახლეები
ეროვნული ბანკის აღმასრულებელი დირექტორი ბექა დოჭვირი, ივანე ჯავახიშვილის 150 წლის იუბილესადმი მიძღვნილი კვირეულის ფარგლებში, თსუ-ში გამართულ ღონისძიებას დაესწრო
30.04.2026.17:13
ეროვნული ბანკის აღმასრულებელი დირექტორი ბექა დოჭვირი, ივანე ჯავახიშვილის 150 წლის იუბილესადმი მიძღვნილი კვირეულის ფარგლებში, თსუ-ში გამართულ ღონისძიებას დაესწრო.
ღონისძიებაზე ბექა დოჭვირმა დიდი ქართველი მეცნიერისა და საზოგადო მოღვაწის, თბილისის სახელმწიფო უნივერსიტეტი - ს დამაარსებლის, ივანე ჯავახიშვილის 150 წლის იუბილესთან დაკავშირებით სებ-ის საკოლექციო მონეტის გამოშვება ოფიციალურად დააანონსა.
„გვჯერა, რომ ახალი საკოლექციო მონეტის გამოშვება ივანე ჯავახიშვილის მდიდარი მემკვიდრეობის წარმოჩენასა და პოპულარიზაციაში მცირე წვლილს შეიტანს. ეს მონეტა იქცევა იმ ინტელექტუალური და სამეცნიერო პროგრესის სიმბოლოდ, რომელსაც ივანე ჯავახიშვილმა ჩაუყარა საფუძველი“, - აღნიშნა ბექა დოჭვირმა.
მისივე განმარტებით, ეროვნული ბანკი ლარის შემოღებიდან დღემდე არაერთ საკოლექციო მონეტას გამოსცემს, რაც ქვეყნის ისტორიის მნიშვნელოვან მოვლენებსა და თარიღებს ასახავს, მათ შორის - სახელმწიფოებრიობის 3 000 წლის იუბილეს, დამოუკიდებლობის აღდგენის 100 წლისთავს, პირველი ქართული კონსტიტუციის 100 წელს, „საქართველოს მეფეების“ სერიას, თბილისის სახელმწიფო უნივერსიტეტის 100 წლის იუბილესა და ლარის მიმოქცევაში შესვლის 30 წელს.
ბექა დოჭვირის თქმით, ასეთი პროექტები ეროვნული ვალუტის პოპულარიზაციას უწყობს ხელს.
ღონისძიება თსუ-ის რექტორმა, აკადემიკოსმა ჯაბა სამუშიამ გახსნა, რომელმაც დამსწრე საზოგადოებას სიტყვით მიმართა და იუბილეს მნიშვნელობაზე ისაუბრა. მან ივანე ჯავახიშვილის მიერ ქართული მეცნიერებისა და უმაღლესი განათლების განვითარებაში შეტანილ ფუნდამენტურ წვლილზე გაამახვილა ყურადღება.
