საქართველოში დაჭრილ მებრძოლთა კვირეული აღინიშნება. საგანგებო ღონისძიება თავდაცვის სამინისტროს „არმიჰოლში“ ჩატარდა, სადაც კიდევ ერთხელ აღინიშნა საქართველოს ტერიტორიული მთლიანობის დაცვისა და საერთაშორისო სამშვიდობო მისიებში ქართველი სამხედროების მიერ შეტანილი წვლილი, დაჭრილი სამხედროების რეაბილიტაციაზე, სოციალურ დაცვასა და სამედიცინო მხარდაჭერაზე ზრუნვა. 

წარმოდგენილი იყო დაჭრილ მებრძოლთა აქტიური ცხოვრების ამსახველი ფოტოგამოფენა დასხვადასხვა სპორტულ შეჯიბრში მიღებული ჯილდოების ექსპოზიცია. სტუმრებს პარასპორტულიინვენტარის დათვალიერების საშუალება ჰქონდათ, რომელიც “დაჭრილ მებრძოლთა თანადგომის ფონდის” ჩართულობით იქნა შეძენილი. 

ფონდი 2018 წელს კომპანია სილქნეტმა დაარსა და განსაკუთრებულ ყურადღებას უთმობს ვეტერანებისა და სამხედრო მოსამსახურეების ფსიქოლოგიურ და ფიზიკურ რეაბილიტაციას. ერთ-ერთი მნიშვნელოვანი პრიორიტეტი  კი,  საქართველოს თავდაცვის სამინისტროს დაჭრილ მებრძოლთა სპორტული გუნდის მხარდაჭერაა.  დაჭრილ-დაშავებული სამხედრო მოსამსახურეები წარმატებით მონაწილეობენ საერთაშორისო ძლიერთა თამაშებში - მჯდომარე კალათბურთისა და მშვილდოსნობისა და სპორტის სხვა სახეობაში. ბრიტანულ საერთაშორისო საქველმოქმედო ორგანიზაციასთან — Invictus Games Foundation-თან თანამშრომლობით, „დაჭრილ მებრძოლთა თანადგომის ფონდმა“  გუნდები შესაბამისი  ინვენტარით უზრუნველყო. სხვადასხვა წლებში ფონდმა შეიძინა მჯდომარე კალათბურთის ეტლები და მშვილდოსნობისთვის საჭირო აღჭურვილობა.

წელს კომპანია სილქნეტისა და ფონდის მხარდაჭერით,   მჯდომარე რაგბის ეტლები გადაეცა სპორტულ გუნდს, რაც საშუალებას აძლევს დაჭრილ მებრძოლებს სპორტის ამ სახეობაშიც დაიწყონ მომზადება.  მჯდომარე კალათბურთის, მშვილდოსნობისა და სპორტის სხვა  სახეობის  გუნდები  „ძლიერთა თამაშებში“ (Invictus Games) იასპარეზებენ, რომელიც 2027 წელს დიდ ბრიტანეთში, ბირმინგემში გაიმართება.

დაარსების დღიდან,  მთავარმა დონორმა,  სილქნეტმა ფონდში 2 681 000 ლარი გადარიცხა. რაც შეეხება, სხვა კომპანიებისა და კერძო შემომწირველების მხარდაჭერას, ასევე საქართველოს თავდაცვის სამინისტროსთან პარიტეტული თანადაფინანსებას, ფონდმა ჯამურად 7 მილიონ ლარზე მეტი მოახმარა დაჭრილი მებრძოლებისა და მათი ოჯახების სამედიცინო თუ სხვა საჭიროებებს.

დაჭრილ მებრძოლთა კვირეული 2021 წლიდან ტარდება და სტარტს ყოველ წელს, 30 ივნისს, დაჭრილ მებრძოლთა დღეს იღებს. ამ თარიღთან დაკავშირებით ტრადიციულად იმართება სპორტული და კულტურული კვირეული, რომლის მიზანია დაჭრილი და დაშავებული სამხედრო მოსამსახურეების მხარდაჭერა, მათი მიღწევების წარმოჩენა და საზოგადოების ცნობიერების ამაღლება.

„დაჭრილ მებრძოლთა თანადგომის ფონდში“ დონაციის განსახორციელებლად შექმნილია საქველმოქმედო ნომერი 0 901 777 771 (1 ზარი-1 ლარი) და გახსნილია ანგარიშები, სადაც ნებისმიერი თანხით შესაძლებელია გმირი მებრძოლების მხარდაჭერა. ფონდის შემომწირველები არიან სხვადასხვა კომპანიები და კერძო პირები.  ფინანსური და წლიურიანგარიშები გამოქვეყნებულია ფონდის ვებ გვერდზე.