საუნივერსიტეტო კონკურსის UNI4VERSE-FINEDU 2026-ის ფარგლებში უმაღლესი საგანმანათლებლო დაწესებულებების წარმომადგენლებთან სამუშაო შეხვედრა გაიმართა.

კონკურსი საქართველოს ეკონომიკისა და მდგრადი განვითარების სამინისტროს ინოვაციების და ტექნოლოგიების სააგენტოს ეგიდით და საქართველოს ეროვნული ბანკის პარტნიორობით იმართება. წლევანდელ კონკურსში ქვეყნის მასშტაბით 32 უნივერსიტეტი ჩაერთვება.

შეხვედრაზე ინოვაციების და ტექნოლოგიების სააგენტოს თავმჯდომარის მოადგილემ გიგი კეჟერაშვილმა კონკურსის მონაწილეებს UNI4VERSE-ის განახლებული ფორმატი, კონკურსის ეტაპები და სტუდენტების ჩართულობის პირობები გააცნო. გიგი კეჟერაშვილის თქმით, UNI4VERSE არის პლატფორმა, რომელიც საქართველოს უნივერსიტეტების სტუდენტებს აძლევს შესაძლებლობას, იმუშაონ რეალურ და გლობალურ გამოწვევებზე და შექმნან ინოვაციური და ტექნოლოგიური გადაწყვეტილებები.

“ჩვენი მიზანია, ახალგაზრდებს მივცეთ ცოდნა, რესურსები და შესაძლებლობა, რომ იდეები რეალურ პროდუქტებად და წარმატებულ სტარტაპებად გარდაქმნან და საბოლოოდ საერთაშორისო ასპარეზზეც წარადგინონ.” - განაცხადა გიგი კეჟერაშვილმა.

UNI4VERSE 2026-ის მთავარი თემა ფინანსური განათლებაა. სტუდენტური გუნდები იმუშავებენ თანამედროვე ფინანსურ გამოწვევებზე, მათ შორის, ფინანსური სერვისების ინტეგრაციაზე; გრძელვადიან ფინანსურ დაგეგმვაზე; კიბერუსაფრთხოებაზე; ყოველდღიური ფინანსებისა და მცირე ბიზნესის ფულადი ნაკადების მართვაზე.

UNI4VERSE-FINEDU-ის ფინალური ეტაპი 2 ნოემბერს თბილისის ტექნოპარკში გაიმართება. ფინალში გამოვლენილი გამარჯვებული გუნდი პორტუგალიის დედაქალაქ ლისაბონში, მსოფლიოს ერთ-ერთ მნიშვნელოვან ტექნოლოგიურ ღონისძიებაზე - Web Summit-ზე გაემგზავრება. კონკურსის ფარგლებში ასევე გამოყოფილია 20 000 ლარის ოდენობის გრანტი.

UNI4VERSE ყოველწლიური საუნივერსიტეტო კონკურსის სახით ჩატარდება.
სტუდენტებისთვის კონკურსში რეგისტრაცია უკვე გახსნილია. რეგისტრაციის ბოლო ვადაა 8 ოქტომბერი. სარეგისტრაციო ფორმა: https://apps.mygita.ge/zs/mmBBpo
პროექტს ახორციელებს „ინოვაციური განათლების ფონდი“, საქართველოს განათლების, მეცნიერებისა და ახალგაზრდობის სამინისტროს მხარდაჭერით.