“500 Global in Eurasia-ს მეათე ნაკადის Demo Day კიდევ ერთხელ ადასტურებს, რომ საქართველო რეგიონში სტარტაპებისა და ინოვაციების განვითარებისთვის მნიშვნელოვან ცენტრად ყალიბდება”. - ამის შესახებ საქართველოს ინოვაციების და ტექნოლოგიების სააგენტოს თავმჯდომარემ ავთანდილ კასრაძემ 500 Global in Eurasia-ს შემაჯამებელი ღონისძიებზე განაცხადა.

GITA-ს თავმჯდომარემ აღნიშნული პროგრამის მნიშვნელობაზე ისაუბრა, მისი თქმით პროგრამა ქართველ და რეგიონულ დამფუძნებლებს უნიკალურ შესაძლებლობას აძლევს, მიიღონ საერთაშორისო დონის მენტორობა, დახვეწონ ბიზნესმოდელები და დაუკავშირდნენ ინვესტორებსა და გლობალურ ბაზრებს.

“ჩვენი მიზანია, საქართველოში შეიქმნას ისეთი ეკოსისტემა, სადაც ინოვაციური იდეები სწრაფად გადაიქცევა კონკურენტუნარიან ტექნოლოგიურ კომპანიებად” - აღნიშნა ავთანდილ კასრაძემ.

500 Global-ის ინიციატივით, GITA-თან და საქართველოს ბანკთან პარტნიორობით, უკვე მეათედ, საქართველოში 500 Global in Eurasia გაიმართა. აქსელერაციის პროგრამაში წელს მონაწილეობა განსხვავებული პროფილის მქონე ცხრა სტარტაპმა მიიღო.

დემო დღის ფარგლებში პროგრამის მონაწილე სტარტაპებმა ინვესტორებს, კორპორაციული სექტორის წარმომადგენლებსა და ინდუსტრიის ექსპერტებს საკუთარი ბიზნესიდეები, მიღწეული პროგრესი და სამომავლო განვითარების ხედვა წარუდგინეს. ღონისძიება მონაწილეებისთვის მნიშვნელოვანი შესაძლებლობა იყო, პოტენციურ ინვესტორებთან და პარტნიორებთან პირდაპირი კომუნიკაცია დაემყარებინათ.

500 Global in Eurasia-ს 12-კვირიანი აქსელერაციის პროგრამის განმავლობაში სტარტაპებმა იმუშავეს საერთაშორისო გამოცდილების მქონე მენტორებთან, გაიარეს ინტენსიური სასწავლო მოდულები, მიიღეს პრაქტიკული ცოდნა და დახვეწეს საკუთარი ბიზნესმოდელები, რათა უფრო კონკურენტუნარიანები გამხდარიყვნენ, როგორც ადგილობრივ, ისე გლობალურ ბაზრებზე.

2022 წელს 500 Global-მა, საქართველოს ბანკთან და GITA-სთან ოთხწლიანი პარტნიორობის ხელშეკრულება გააფორმა, რომლის ფარგლებშიც, 500 Global in Eurasia-ს აქსელერაციის პროგრამა საქართველოში, თბილისში წელიწადში ორჯერ იმართება.