თბილისში ჩატარებული საერთაშორისო ფორუმი საქართველოს საჯარო სერვისების მოდელის კიდევ ერთი მნიშვნელოვანი აღიარება იყო, -  ამის შესახებ გადაცემა „იმედის დილაში“, რუბრიკა Business Insider Georgia-ში სტუმრობისას, საქართველოს იუსტიციის მინისტრის პირველმა მოადგილემ ბექა ძამაშვილმა განაცხადა.

„ეს სამდღიანი ფორუმი, შეიძლება ითქვას, რომ ძალიან წარმატებით დასრულდა. ეს არ არის ჩვენი შეფასება, არამედ ამას აღნიშნავდნენ როგორც გაეროს წარმომადგენლები, ასევე თითოეული მონაწილე. უნდა აღინიშნოს, რომ ასეთი ღონისძიების ჩატარებას თბილისში ძალიან დიდი მნიშვნელობა აქვს, მათ შორის ეკონომიკის, ბიზნესისა და ტურიზმის განვითარების მიმართულებით, რადგან ჩვენ ვმასპინძლობდით 100-მდე ქვეყნიდან წარმომადგენლებს, დარგის ექსპერტებს, პოლიტიკურ თანამდებობის პირებსა და აკადემიური წრეების წარმომადგენლებს. ფაქტობრივად, მსოფლიოს ყველა კონტინენტიდან ძალიან ბევრი მონაწილე იყო თბილისში ჩამოსული და ჩვენ, გარდა შინაარსობრივი ნაწილისა, შესაძლებლობა გვქონდა, მათთვის ჩვენი ქვეყანა, ჩვენი ქვეყნის პოტენციალი გაგვეცნო.

რაც შეეხება უშუალოდ თემატიკას, ეს შეეხებოდა საჯარო სერვისების განვითარებას, საჯარო სერვისების უფრო მეტად ხელმისაწვდომობას მომხმარებლებისთვის. ამ მიმართულებით, რა თქმა უნდა, თანამედროვე პირობებში მნიშვნელოვანია ტექნოლოგიების დანერგვა. განსაკუთრებით აქცენტი კეთდებოდა ხელოვნური ინტელექტის გონივრულად და სწორად გამოყენებაზე და ეს ყველაფერი ერთდროულად სხვადასხვა ფორმატში იყო წარმოდგენილი.

ხუმრობით ვამბობდით, რომ თუ მსოფლიო ჩემპიონატი ფეხბურთში ამერიკის კონტინენტზე ტარდება, თბილისში ჩატარდა მსოფლიო ჩემპიონატი საჯარო სერვისების მიმართულებით, რადგან მთელი მსოფლიო აქ იყო წარმოდგენილი საუკეთესო ექსპერტებით. თუ რომელიმე ქვეყანას ამ მიმართულებით რაიმე მიღწევა ჰქონდა, სწორედ თბილისში ხდებოდა ამ საკითხზე მსჯელობა. თვითონ ის, რომ ჩვენ ვუმასპინძლეთ ამ ფორუმს, იყო იმის აღიარება, რომ საქართველოში საჯარო სერვისების მიწოდების ქართული მოდელი უმაღლეს დონეზეა, საუკეთესო მაგალითია. არაერთმა ქვეყანამ აღნიშნა, რომ 10 წლის წინ, 7 წლის წინ, თბილისში იმყოფებოდნენ, გაეცნენ იუსტიციის სახლებისა და, ზოგადად, საჯარო სერვისების მიწოდების ქართულ მოდელს და დღეს უკვე მათთან ძალიან წარმატებით ხორციელდება მსგავსი მოდელები“, - აცხადებს ბექა ძამაშვილი.