საქართველოს ბანკი - საქართველოს ეროვნული საკალათბურთო ნაკრების გენერალური სპონსორი.

კიდევ ერთხელ, მორიგ ჯერზე, საქართველოს ნაკრებმა საკალათბურთო სამყაროს დაუმტკიცა, რომ ჩვენთან ფავორიტი არ არსებობს. ესპანეთთან დაპირისპირება მძაფრსიუჟეტიან კინოს ჰგავდა - ეს იყო სცენარი, რომელიც ბოლომდე დაძაბულს გამყოფებს და ფინალში კულმინაციამდე მიგიყვანს. 22-ქულიანი ჩამორჩენის მიუხედავად, ჩვენმა კალათბურთელებმა უკან არ დაიხიეს და არ გაჩერდნენ: აჩვენეს არა მხოლოდ კლასი, არამედ შეუპოვრობა, რომელიც მხოლოდ დიდ სპორტსმენებს ახასიათებთ.

მატჩი ოთარ ქორქიასა და ნოდარ ჯორჯიკიას სახელობის არენაზე მიმდინარეობდა - ეს იყო პირველი ოფიციალური სანაკრებო შეხვედრა მას შემდეგ, რაც დარბაზმა ამ ორი ლეგენდის სახელი მიიღო და როგორი, სიმბოლურია, რომ სწორედ ამ კედლებში, ჩვენმა ბიჭებმა საქართველოს დაუვიწყარი გამარჯვება მოუტანეს.

მატჩის დასაწყისი საკმაოდ მძიმე გამოდგა: ჯგუფში დაუმარცხებელი ესპანეთის ნაკრები მალევე წინ სოლიდური სხვაობით გაიჭრა და პირველი მეოთხედის შემდეგ უკვე 18-ქულიანი უპირატესობა ჰქონდა (32:24). შესვენების შემდეგ, ჩამორჩენამ კრიტიკულ, 22-ქულიან ნიშნულს მიაღწია. დანებება ყველაზე მარტივი გზაა და თითქოს ყველაფერი გადაწყვეტილი იყო, თუმცა ქართული უტეხი ხასიათი სწორედ ამ დროს გამოვლინდა.

ჩვენი კაპიტანი, თორნიკე შენგელია, მოედანზე ფაქტობრივად უწყვეტად, 45 წუთის განმავლობაში იმყოფებოდა. 37 ქულა და 10 მოხსნა - ეს მხოლოდ სტატისტიკა არ არის. თორნიკემ კიდევ ერთხელ გვაჩვენა, რას ნიშნავს ლიდერობა - უხილავი ძალა, რომელსაც მთელი გუნდი და საკალათბურთო არენაზე შეკრებილი ქომაგი გრძნობდა.
მატჩის მიწურულს, დაღლილობის მიუხედავად, შენგელიამ ენერგია მაინც იპოვა და პარტნიორებსაც გადასცა: მისი დამსახურებით, წინ გავედით, თუმცა ესპანელებმა გაათანაბრეს და მატჩი ოვერტაიმში გადავიდა. აქ თავი კვლავ შენგელიამ გამოიჩინა, საქართველომ კი ესპანეთს მორიგი “ქამბექი” შესთავაზა: 5-ქულიანი ჩამორჩენა განულდა, ბოლო აკორდი კი ნატურალიზებულმა კალათბურთელმა, მარკის რიდმა აიღო - რიდმა, რომელმაც 42 წუთში 32 ქულა და 7 ასისტი დააგროვა, ბოლო ზუსტი ორქულიანით მატჩის ბედი გადაწყვიტა (91:89).

ესპანელთა ბოლო, არაზუსტი სამქულიანი და დარბაზის მხურვალე ოვაცია - ეს იყო გამარჯვება, რომელიც მხოლოდ ქულებით არ იზომება. ეს არის მტკიცებულება იმისა, რომ როდესაც მიზანი მკაფიოა, ხოლო გუნდი - ერთიანი, ნებისმიერი მწვერვალის დაპყრობა შესაძლებელია.

სიმტკიცე, გამბედაობა, რწმენა, ღირებულებები და ხასიათი: ეს იყო სიტყვები, რომლითაც საქართველოს ნაკრების მთავარმა მწვრთნელმა, ალეკსანდარ ჯიკიჩმა გამარჯვების შემდეგ თავისი გუნდი დაახასიათა. მწვრთნელმა აღნიშნა, რომ უკრაინასთან რთული მატჩის შემდეგ გუნდმა მენტალური რეაბილიტაცია შეძლო. გუნდის დახასიათებასთან ერთად, ჯიკიჩმა ხაზი გაუსვა კაპიტნის შეუპოვრობას: “მოედანზე ყოფნას მთხოვდაო“ - აღნიშნა სერბმა სპეციალისტმა.

შენგელიას თავგანწირვამ მას ინდივიდუალური რეკორდიც მოუტანა: 37 ქულით მან მაიკლ დიქსონისა და ზაზა ფაჩულიას ისტორიული მაჩვენებელი გააუმჯობესა, თუმცა ასევე აღნიშნა: “ამას ხაზს ნუ გავუსვამთ, მთავარი გუნდური შედეგიაო“.

და რას ნიშნავს ეს გამარჯვება? რა ხდება ამის შემდეგ?

ემოციები გვერდით გადავდოთ და მომავალ შეხვედრებზე ვკონცენტრირდეთ. პირველი ჯგუფური ეტაპი ალექსანდარ ჯიკიჩის გუნდმა 3-3 ბალანსით დაასრულა და მიუხედავად იმისა, რომ ცხრილში ესპანეთისა (5-1) და უკრაინის (4-2) შემდეგ მესამე ადგილი დავიკავეთ, მთავარი ბრძოლები ჯერ კიდევ წინ არის.

სატურნირო ფორმატის თანახმად, პირველი ეტაპის შედეგები მეორე რაუნდში გადაგვყვება, სადაც A ჯგუფის სამეული B ჯგუფის საუკეთესო გუნდებს დაუპირისპირდება. მეორე ეტაპზე ჩვენი მეტოქეები უკვე ცნობილია: საბერძნეთი, მონტენეგრო და პორტუგალია.

ჯიკიჩის გუნდისთვის მეორე ეტაპის მატჩები 2026 წლის აგვისტოდან დაიწყება და 2027 წლის თებერვალ-მარტამდე გაგრძელდება. სწორედ ამ ეტაპზე გაირკვევა, რომელი სამი ნაკრები მოიპოვებს მსოფლიო ჩემპიონატის საგზურს.

მატჩების განრიგი:

• 28.08 | საქართველო v მონტენეგრო

• 31.08 | პორტუგალია v საქართველო

• 26.11 | საბერძნეთი v საქართველო

• 29.11 | საქართველო v პორტუგალია

• 26.02.27 | მონტენეგრო v საქართველო

• 01.03.27 | საბერძნეთი v საქართველო

ერთად ვუგულშემატკივროთ ქართველ კალათბურთელებს. საქართველოს ბანკი – საქართველოს ეროვნული საკალათბურთო ნაკრების გენერალური სპონსორი.