საქართველოს ტექნოლოგიური ეკოსისტემა ახალ ინსტიტუციურ ფაზაში შედის.

ICTA-ს განვითარების გაგრძელებად შეიქმნა ახალი პლატფორმა - The Tech Association, რომელიც პირველად აერთიანებს ICT-ს, FinTech-ს, ციფრულ ბანკინგს, VASP სექტორსა და ტექ-განათლებას ერთ ეკოსისტემაში.
ბოლო წლებში საქართველოს ტექნოლოგიური ინდუსტრია მნიშვნელოვნად გაიზარდა. თუ ადრე სექტორი უფრო ფრაგმენტულად ვითარდებოდა, ICTA-მ მას ინსტიტუციური ჩარჩო და უფრო ძლიერი წარმომადგენლობა შესძინა. თუმცა ეკოსისტემის ზრდასთან ერთად გაჩნდა საჭიროება უფრო ინტეგრირებული მიდგომის.

ტრადიციული ICT-ის პარალელურად სწრაფად განვითარდა FinTech, ციფრული ბანკინგი, ვირტუალური აქტივების სექტორი და ტექნოლოგიური განათლება. მიუხედავად საერთო განვითარების ლოგიკისა, ამ მიმართულებებს შორის თანამშრომლობა ხშირად ფრაგმენტული და არა სისტემური იყო.

The Tech Association სწორედ ამ საჭიროებას პასუხობს. მისი მიზანია ტექნოლოგიური და ფინანსური სექტორების ერთიან პლატფორმაზე გაერთიანება, უკეთესი კოორდინაცია და განვითარების საერთო მიმართულების ჩამოყალიბება.

"ქართული ტექ-ეკოსისტემა მზადაა შემდეგი ნაბიჯისთვის. The Tech Association სწორედ ამ ნაბიჯის ინსტიტუციური გამოხატულებაა," - თორნიკე სულაბერიძე, საბჭოს თავმჯდომარე

ასოციაციის საქმიანობა მოიცავს სექტორებს შორის თანამშრომლობის გაძლიერებას, საერთაშორისო ეკოსისტემებთან ინტეგრაციას, რეგულაციურ პროცესებში ერთობლივ ჩართულობას და ტალანტების განვითარების მხარდაჭერას. განსაკუთრებული ყურადღება ეთმობა საქართველოს, როგორც რეგიონული ტექნოლოგიური ჰაბის, პოზიციონირების გაძლიერებას.

აღსანიშნავია, რომ ამ პროცესში ერთ-ერთ მთავარ მიმართულებად რჩება ტექ-განათლება.

"ტექ-განათლება წარმოადგენს ტექნოლოგიური ეკოსისტემის საფუძველს. მისი ეფექტიანობა პირდაპირ არის დამოკიდებული ბაზრის რეალურ მოთხოვნებთან შესაბამისობაზე. The Tech Association-ის კონტექსტში მნიშვნელოვანია ისეთი საგანმანათლებლო გარემოს განვითარება, რომელიც უზრუნველყოფს კვალიფიციური, პრაქტიკაზე ორიენტირებული ტალანტის მომზადებას და მის ინტეგრაციას ინდუსტრიაში,"- ტექნოლოგიების ასოციაციის დამფუძნებელი, გიორგი მარიამიძე

ბოლო წლებში საქართველო რეგიონში ერთ-ერთ ყველაზე სწრაფად მზარდ ტექნოლოგიურ ჰაბად ყალიბდება. The Tech Association ამ პროცესის გაგრძელებაა. ერთიანი პლატფორმა, რომელიც ქვეყნის ტექნოლოგიურ, ფინანსურ და საგანმანათლებლო ეკოსისტემას აერთიანებს.