2025 წელი ტურიზმის სექტორისთვის ძალიან საინტერესო იყო იმ კუთხით, რომ რამდენიმე ახალი ავიაკომპანია დაემატა საქართველოს საავიაციო ბაზარს - Voyager-ის დირექტორი
2025 წელი ტურიზმის სექტორისთვის ძალიან საინტერესო იყო იმ კუთხით, რომ რამდენიმე ახალი ავიაკომპანია დაემატა საქართველოს საავიაციო ბაზარს, – ამის შესახებ Business Insider Georgia-სთან 2025 წლის ტურიზმის სტატისტიკის შეფასებისას კომპანია Voyager-ის დირექტორმა სოფო აზარაშვილმა განაცხადა.
მისი თქმით, ავიაკომპანიების მატება და პირდაპირი რეისების არსებობა ხელს უწყობს უფრო მეტ მოგზაურობას კონკრეტული ქვეყნებიდან.
„პლუს გაიხსნა ბევრი ბუტიკური ტიპის სასტუმრო და, შესაბამისად, წლიდან წლამდე ტურიზმის სექტორი ძალიან ვითარდება და ეს ყველაფერი ძალიან სასიხარულოა ჩვენთვის, კერძო სექტორისთვის“, – განმარტავს აზარაშვილი.
Voyager-ის დირექტორი აღნიშნავს, რომ 2025 წელი წარმატებული იყო Voyager-ისთვისაც, რომელიც საქართველოში ხუთი უცხოური ავიაკომპანიის წარმომადგენელია (GSA).
„ჩვენი კომპანიისთვის 2025 წელი ძალიან წარმატებული იყო. მიუხედავად იმისა, რომ ზაფხულის განმავლობაში პრაქტიკულად ორი თვე შეჩერებული იყო ბევრი რეისი შუა აღმოსავლეთის ომის გამო და ხალხი მოგზაურობისგან თავს იკავებდა. ამის მიუხედავად, 2025 წელი Voyager-მა ძალიან წარმატებით დახურა და 2024 წელთან შედარებით 15%-იანი ზრდა გვაქვს. აქვე საინტერესოა ისიც, რომ ტურიზმის ეროვნული ადმინისტრაცია ძალიან აქტიურ მარკეტინგულ კამპანიებს აწარმოებს სხვადასხვა ახალ ბაზრებზე, მაგალითად ჩინეთში, რათა მოხდეს ჩვენი ქვეყნისთვის ბაზრების დივერსიფიკაცია.
2026 წელს ვფიქრობ, რომ იმდენად ბევრი გამოფენა არის დაგეგმილი სხვადასხვა ბაზრებზე ტურიზმის ეროვნული ადმინისტრაციის მხრიდან, კერძო სექტორის მონაწილეობით, რომ 2026 წელსაც ველოდები ბევრად უფრო კარგ ციფრებს და მეტ ზრდას.
2026 წელს ჩვენი მთავარი პრიორიტეტი იქნება, რომ ვინაიდან ძირითადად გალფის ქვეყნებსა და ინდოეთზე ვართ ორიენტირებულები, ჩვენი სამიზნე ბაზრები კიდევ უფრო დავადივერსიფიციროთ და უკვე წელს დავკონცენტრირდებით ჩინეთსა და ისრაელზე“, – აცხადებს Voyager-ის დირექტორი სოფო აზარაშვილი.
სხვა სიახლეები
როგორია ადგილობრივი ტურიზმის სტატისტიკა
24.08.2026.21:41
2026 წლის II კვარტალში საქართველოს ტერიტორიაზე 15 წლის და უფროსი ასაკის ადგილობრივი ვიზიტორების საშუალო თვიური რაოდენობა 1 365.3 ათასით განისაზღვრა, რომელთა მიერ ქვეყნის ტერიტორიაზე განხორციელებული ვიზიტების საშუალო თვიურმა რაოდენობამ 1 699.1 ათასი ერთეული შეადგინა. აღნიშნულ პერიოდში ვიზიტორების საშუალო თვიური რაოდენობა შემცირდა 0.1 პროცენტით, ხოლო მათ მიერ განხორციელებული ვიზიტების რაოდენობა 1.1 პროცენტით მეტია წინა წლის ანალოგიური პერიოდის მაჩვენებელზე.
2026 წლის II კვარტალში საქართველოს რეზიდენტი ვიზიტორების მიერ საქართველოს ტერიტორიაზე განხორციელებული ტურისტული ტიპის ვიზიტების საშუალო თვიური რაოდენობა 683.4 ათასით განისაზღვრა, რაც 1.3 პროცენტით ნაკლებია წინა წლის ანალოგიური პერიოდის მაჩვენებელზე.
ვიზიტორების უმრავლესობა, 36.1 პროცენტი, 51-70 წლამდე ასაკობრივ კატეგორიას მიეკუთვნებოდა, ქალების რაოდენობა კი ვიზიტორების ჯამური რაოდენობის 56.0 პროცენტს შეადგენდა.
გამოკვლევის შედეგების მიხედვით, ვიზიტორების 38.2 პროცენტი ქ. თბილისის მაცხოვრე- ბელია, 16.3 პროცენტი მოდის იმერეთის, რაჭა-ლეჩხუმისა და ქვემო სვანეთის რეგიონზე, ხოლო დანარჩენი რეგიონები შედარებით დაბალი წილებით არის წარმოდგენილი.
2026 წლის II კვარტალში ვიზიტების უმრავლესობა (52.6 პროცენტი) განხორციელდა მეგობრების/ნათესავების მონახულების მიზნით.
საანგარიშო პერიოდში ყველაზე მეტი ვიზიტი განხორციელდა იმერეთის რეგიონსა (საშუალოდ 377.4 ათასი ვიზიტი თვეში) და ქ. თბილისში (საშუალოდ 377.4 ათასი ვიზიტი თვეში).
2026 წლის II კვარტალში განხორციელებული ვიზიტებისას გაწეული საშუალო თვიური ხარჯების მოცულობა განისაზღვრა 300.7 მილიონი ლარით, რაც 7.2 პროცენტით მეტია გასული წლის ანალოგიური პერიოდის მაჩვენებელზე. ამასთან, ერთ ვიზიტზე გაწეული საშუალო ხარჯი გაიზარდა 6.0 პროცენტით და 177.0 ლარს გაუტოლდა.