მიუხედავად რეგიონში შექმნილი დაძაბულობების, მაინც მოგვეხდინა დინამიური ფასწარმოქმნა, - ამის შესახებ ტელეკომპანია „მაესტროს“ ეთერში გადაცემა Business Insider Georgia-ში სტუმრობისას კომპანია HSC Group Hospitality-ს დირექტორმა გიორგი დოლიძემ განაცხადა. მისივე თქმით, მარტში ახლო აღმოსავლეთში განვითარებულმა მოვლენებმა სექტორზე უარყოფითი გავლენა იქონია, თუმცა მარტის ბოლოდან სიტუაცია სტაბილურდება და იზრდება მოლოდინი, რომ არაბეთის გაერთიანებული საამიროების მიმართულებით შეზღუდული ტურისტული ნაკადების ნაწილი საქართველოსკენ გადმოინაცვლებს.

„მოლოდინებზე ვიტყვი, რომ გვაქვს საკმაოდ პოზიტიური და დამაიმედებელი, გამომდინარე იქიდან, რომ ჩვენ აპრილის თვე ფაქტობრივად დავხურეთ 85-90%-იანი დატვირთულობით, რაც არის დაახლოებით 5%-ით უფრო მაღალი, ვიდრე გასული წლის ანალოგიური პერიოდი. ასევე ვეცადეთ, რომ, მიუხედავად რეგიონში შექმნილი დაძაბულობისა, მაინც მოგვეხდინა დინამიური ფასწარმოქმნა - სადაც იყო გაზრდილი მოთხოვნა, თავისთავად ფასებიც გვქონდა შესაბამისი, ხოლო სადაც არა, უფრო დაკორექტირებული ფასებით მოგვეზიდა მომხმარებელი.

ჩვენ ამაზე გასულ თვესაც ვსაუბრობდით, როდესაც ვაფასებდით მოლოდინებს, კონკრეტულად რა შედეგები და რა ეფექტები შეიძლება მოეხდინა უშუალოდ ახლო აღმოსავლეთში შექმნილ სიტუაციას, რამაც თავისთავად მარტში იქონია ასეთი პირდაპირი გავლენა და დადო ის შედეგი, რაც იყო ყველასთვის, ასე ვთქვათ, სამწუხარო. თუმცა, დაახლოებით 25-30 მარტიდან დღემდე ვიტყვი, რომ სიტუაცია ძალიან სწრაფად აღდგება და, ასე ვთქვათ, სტაბილურდება.

რაც უფრო დრო გადის, მართლდება ის, რასაც ვვარაუდობდით საამიროების მიმართულებით: როდესაც აღნიშნული მიმართულებები ჩაკეტილი იყო და უშუალოდ ევროპიდან თუ ჩვენი მეზობელი ქვეყნებიდან ვიზიტებზე ძალიან დიდი მოთხოვნა ფიქსირდებოდა, ჩვენ გამოვთქვამდით ვარაუდს, რომ მათი ნაწილი გადმომისამართდებოდა სწორედ საქართველოში“, - აცხადებს გიორგი დოლიძე.

HSC Group Hospitality-ის დირექტორი ამბობს, რომ საქართველო რეგიონში უსაფრთხო ტურისტულ მიმართულებად პოზიციონირდება, რამაც ახლო აღმოსავლეთში არსებული შეზღუდვების ფონზე დამატებითი ტურისტული ნაკადების მოზიდვას შეუწყო ხელი. მისივე პროგნოზით, 2026 წლის ტურისტული სეზონი 2025 წლის მაჩვენებელს მინიმუმ 5%-ით გადააჭარბებს.

„შეგვიძლია ვთქვათ, რომ ამ ვარაუდმა გაამართლა, იმიტომ რომ აღნიშნული ქვეყნებიდან ის ტრაფიკი და ნაკადი, რომელიც მიდიოდა კონკრეტულად საამიროების მიმართულებით, თავისთავად, რაღაც დოზით ჩვენთანაც წამოვიდა. ამას ძალიან შეუწყო ხელი ფრენებმა ევროპის მიმართულებიდან, რომლებიც 2025 წლის განმავლობაში აქტიურად და არაერთი მიმართულებით დაგვემატა.

ხელი შეუწყო ასევე საქართველოს პოზიციონირებამ, როგორც რეგიონში ერთ-ერთმა უსაფრთხო მიმართულებამ და ოთხი სეზონის ქვეყანამ, სადაც ადამიანს შეუძლია ჩამოვიდეს და ნებისმიერი მისთვის სასურველი ტურისტული ატრაქციონი მოინახულოს, ტურისტული აქტივობით დაკავდეს და ასე შემდეგ.

ნამდვილად საამაყოა, რომ საქართველო წლიდან წლამდე ზრდის ტურისტულ ნაკადებსა და შემოსავლებს ტურიზმის მიმართულებით. ვფიქრობ, 2026 წელიც, გამომდინარე დღევანდელი რეალობიდან - იმ ფორკასტის ჭრილში, რაც გვაქვს 2026 წლის სეზონისთვის და არა მარტო - მინიმუმ 5%-ით მაინც გადააჭარბებს 2025 წლის ანალოგიურ პერიოდს, მიუხედავად იმ წერტილოვანი დარტყმებისა და ჩავარდნებისა, რასაც ბოლო წლებში ჩვენი სექტორი, სამწუხაროდ, განიცდის“, - აღნიშნა დოლიძემ.