ბათუმი შავი ზღვის რეგიონში ბიზნესისა და ტურიზმის ახალ ცენტრად ყალიბდება - Business Insider Polska
Business Insider – ის პოლონური გამოცემა ბათუმის შესახებ ვრცელ სტატიას აქვეყნებს. პრესტიჟული გამოცემა, რომელიც ძირითადად ბიზნესს სიახლეებზეა ორიენტირებული, მკითხველს ბათუმს, როგორც ბიზნესისა და ტურიზმის ახალ მიმართულებას აცნობს. „ბათუმი სულ უფრო თამამად ცვლის იმ გზავნილს, რომლითაც საკუთარ თავს მსოფლიოს აცნობს. შავი ზღვისპირა კურორტის ტრადიციულ იმიჯს თანდათან ცვლის ამბავი ტურისტულ მიმართულებაზე, რომელსაც სურს მიიზიდოს არა მხოლოდ ტურისტები, არამედ ბიზნესი, ღონისძიებები და ის მოგზაურები, რომლებიც ახალ მიმართულებებს ეძებენ,“ წერია სტატიაში.
Business Insider Polska განსაკუთრებულ ყურადღებას ამახვილებს ქალაქის ისტორიულ სავაჭრო მნიშვნელობაზე, თანამედროვე ურბანულ განვითარებაზე, საერთაშორისო ბრენდების სასტუმრო ინფრასტრუქტურასა და MICE ტურიზმის (შეხვედრები, კონფერენციები, ინსენტივ-მოგზაურობები და გამოფენები) განვითარების პერსპექტივებზე. გამოცემა აღნიშნავს, რომ ბათუმი ბუნებრივ უპირატესობებს თანამედროვე ინფრასტრუქტურასთან წარმატებით აერთიანებს.
სტატიაში ხაზგასმულია, რომ „ბათუმში მრავლადაა საერთაშორისო სასტუმრო ბრენდებიც, რომლებიც ქალაქის სანდოობას უცხოელი სტუმრების თვალში აძლიერებენ. ისეთი ბრენდების არსებობა, როგორებიცაა Sheraton, Hilton, Radisson Blu, Marriott, Wyndham და Le Meridien, ნიშნავს მომსახურების ცნობად სტანდარტს და იმ ინფრასტრუქტურას, რომელიც უფრო მასშტაბური ღონისძიებების ორგანიზებისთვის არის საჭირო. MICE ინდუსტრიისთვის, რომელიც მოიცავს შეხვედრებს, კონფერენციებს, ინსენტივ-მოგზაურობებსა და კორპორაციულ ღონისძიებებს, ასეთი სტანდარტი არსებითად სერიოზული საუბრის საწყისი წერტილია.“
გამოცემა ასევე მიმოიხილავს აჭარის მრავალფეროვან ტურისტულ შესაძლებლობებს - ბათუმის ბოტანიკურ ბაღს, დაცულ ტერიტორიებს, მთიან აჭარას, კულტურულ მემკვიდრეობას, ადგილობრივ გასტრონომიასა და მზარდ ავიამიმოსვლას, რაც რეგიონის ოთხივე სეზონზე მიმზიდველ ტურისტულ მიმართულებად ჩამოყალიბებას უწყობს ხელს.
სტატიის დასასრულს Business Insider Polska აღნიშნავს, რომ ბათუმი უკვე ფლობს ყველა იმ ძირითად კომპონენტს, რომელიც საერთაშორისო ბიზნესისა და ტურიზმის ცენტრისთვის არის საჭირო და ასკვნის: „ბევრი ქალაქისგან განსხვავებით, რომლებიც საკუთარი თანამედროვეობის შესახებ ამბის შექმნას ცდილობენ, ბათუმს ეს თანამედროვეობა უკვე აქვს... თუ ქალაქი ამ მომენტს სწორად გამოიყენებს, შავი ზღვა მოგზაურთა ნაწილისთვის ბათუმი შესაძლოა აღარ იყოს ნაცნობი რუკის დასასრული და უბრალოდ, ახალი მიმართულების დასაწყისად იქცეს.“
Business Insider Polska პოლონეთის ერთ-ერთი წამყვანი ბიზნესგამოცემაა, რომელსაც ყოველთვიურად მილიონობით მკითხველი ჰყავს და რომელიც ეკონომიკის, ინვესტიციების, ფინანსებისა და საერთაშორისო ბიზნესის საკითხებს აშუქებს.
დღის ტოპ 10 სიახლე
სხვა სიახლეები
ჩინელი ტუროპერატორები და ინფლუენსერები საქართველოს ტურისტულ პოტენციალს გაეცნენ
22.07.2026.10:11
შანხაისა და თბილისს შორის პირდაპირი ფრენების დანიშვასთან დაკავშირებით, საქართველოს ეკონომიკისა და მდგრადი განვითარების სამინისტროს ტურიზმის ეროვნულმა ადმინისტრაციამ ჩინელ ტუროპერატორებსა და ინფლუენსერებს უმასპინძლა.
გაცნობითი ტურის ფარგლებში საქართველოს ჩინური მედიისა და ტურისტული კომპანიების 12 წარმომადგენელი ეწვია. სტუმრები გაეცნენ საქართველოს ტურისტულ პროდუქტებს, თბილისის მარშრუტებს, ქართულ სამზარეულოსა და ღვინოს.
საქართველოში ვიზიტის შემდეგ ტუროპერატორები შეიმუშავებენ ახალ მარშრუტებს და ჩინელ მოგზაურებს საქართველოს მიმართულებით ჯგუფურ ტურისტულ პაკეტებს შესთავაზებენ.
„ჩემთვის დიდი პატივია, რომ შანხაიდან თბილისის მიმართულებით პირვლეი ავიარეისით ვიმგზავრე. ჩვენ გავეცანით საქართველოს მიმართულებას, ძალიან გვახარებს თბილისის ულამაზესი ხედების ხილვა. მიღებულ შთაბეჭდილებებს სულ უფრო მეტ მგზავრს გავუზიარებთ, რათა მათ ჩვენი ავიკომპანიის საშუალებით ჩინეთიდან საქართველოში იმოგზაურონ. მოხარულნი ვართ, რომ გვეძლევა ინდუსტრიის წარმომადგენლებთან შეხვედრის შესაძლებლობა. ოპტიმისტურად ვართ განწყობილები და ველოდებით, რომ მომავალში პარტნიორობას კიდევ უფრო გავაღრმავებთ”,-აცხადებს China Eastern Airlines-ის წარმომადგენელი სტივენ ლი.
„ვფიქრობ, ეს ახალი მარშრუტი საქართველოში ბევრ ჩინელ ტურისტს ჩამოიყვანს. რეალურად, ჩვენგან ცოტამ თუ იცის საქართველოს საოცარი ბუნებისა და შესანიშნავი კერძების შესახებ. მიმაჩნია, რომ ეს ახალი მარშრუტი ორმხრივად მომგებიანი იქნება. ჩემს გამომწერებს აუცილებლად ვურჩევ, რომ საქართველოს ეწვიონ”,-აღნიშნავს ტანგ ჯინგი, ინფლუენსერი ჩინეთიდან.
„პირველ რიგში გეტყვით რომ თბილისზე ძალიან კარგი შთაბეჭდილება დამრჩა. უკან დაბრუნებისთანავე აქტიურად გავუწევ პოპულარიზაციას საქართველოს დედაქალაქს და ამ ტურისტულ მიმართულებას. მას შემდეგ, რაც პირდაპირი ფრენები დაიწყო ვფიქრობ ჩინეთიდან საქართველოში ბევრი მოგზაური ჩამოვა და ეს მიმართულება უფრო პოპულარული გახდება. ვფიქრობ, მომავალ წელს ჩვენმა სააგენტომ თვეში 4 ტურისტული ჯგუფი გამოაგზავნოს საქართველოში, თითო ჯგუფში დაახლოებით 20 ადამიანი იქნება. ჩვენ ამ მიმართულების პოპულარიზაციას აქტიურად გავუწევთ“,-ამბობს Shanghai Zongxing Group Travel Agency-ის წარმომადგენელი ვუ სიაო იანი.
China Eastern Airlines-მა შანხაი-თბილისი-შანხაის მიმართულებით პირდაპირი რეისები 15 ივლისიდან დაიწყო. ავიაკომპანიის ბორტი საქართველოს მიმართულებით კვირაში სამჯერ ოთხშაბათს, პარასკევსა და კვირას დაფრინავს.
