ჩინეთიდან ძალიან დიდი ზრდა გვაქვს - თბილისი-შანხაის რეისები 98-99%-ით დატვირთულია, - ამის შესახებ გადაცემა „იმედის დილაში“ რუბრიკა Business Insider Georgia-ში სტუმრობისას ტურიზმის ეროვნული ადმინისტრაციის ხელმძღვანელმა მაია ომიაძემ განაცხადა.

„9 თვის, პირველი სამი კვარტლის მონაცემი ძალიან დადებითია, ძალიან პოზიტიურია, მით უფრო, როგორც თქვენ გახსნით სიტყვაში აღნიშნეთ, მეორე კვარტალში რეგიონში მიმდინარე ომებიდან გამომდინარე, ნამდვილად მსოფლიო ტურიზმის ორგანიზაციამ სავარაუდო დანაკარგებზე რომ ისაუბრა, უკვე ჩვენ ვიცოდით, რომ წლის ბოლომდე შესაძლო დანაკარგებზე იქნებოდა საუბარი და ჩვენ თქვენს ეთერშიც ვისაუბრეთ, რომ პრევენციულად, ეკონომიკის სამინისტროსთან, აეროპორტების გაერთიანებასთან, ავიაციასთან ერთად აქტიურად ვიმუშავეთ, რომ მოგვეხერხებინა უკვე მესამე კვარტალში შესაძლო დანაკარგების მინიმიზაცია და ნამდვილად ასეც მოხდა. ძალიან კარგი შედეგი გვაქვს როგორც შემოსავლების, ისე ვიზიტორების ოდენობის თვალსაზრისით. 6 მილიონს გადააჭარბა საერთაშორისო მოგზაურობის ოდენობამ და 3.8 მილიარდი ამერიკული დოლარი არის შემოსავალი ტურიზმიდან.

უშუალოდ ცალ-ცალკე ქვეყნებზეც რომ ვისაუბროთ და ჩაშლილ სტატისტიკაზე, ძალიან თვალნათელია მუშაობის შედეგი. თქვენ რომ ნახოთ, ჩვენ აქტიურად რომელ ბაზრებზე ვმუშაობთ სტრატეგიულად, სადაც კამპანიები გვაქვს და, ამავდროულად, რომელი ქვეყნებიდან ემატება პირდაპირი რეისები, ეს თითქოს შემთხვევით არ არის, რომ სწორედ ამ ბაზრებიდან ჩვენ გვაქვს მნიშვნელოვანი ზრდები.

გარკვეულწილად, ზოგიერთ ბაზარზე გვაქვს, რა თქმა უნდა, შენარჩუნების ტენდენცია და ვცდილობთ, რომ ნაკლები დანაკარგი იყოს, ისევ და ისევ ომის ეფექტიდან გამომდინარე. თუმცა ძალიან წარმატებით შევძელით, რომ ეს ჩანაცვლება იმ ბაზრებზე, სადაც ცნობადობა ისედაც მაღალია, მარკეტინგული აქტივობებით, ბიზნესშეხვედრებით, B2B შეხვედრებით, road show-ებით, ძალიან მალე მიგვეღო ეფექტი.

მესამე კვარტლის მონაცემები ჩაშლილად რომ ნახოთ, მთლიანი სამი კვარტლის მონაცემები არის ამ პლუსებით გასული და მეორე კვარტლის მცირედმა მინუსმა დააბალანსა, თორემ ცალკე მესამე კვარტალში კიდევ ბევრად მეტი ზრდებია, რაც სწორედ ამ მუშაობის ეფექტს აჩვენებს.

ასევე მინდა დავამატო: სტრატეგიულ ბაზრებზე როდესაც ჩვენ ვსაუბრობთ, ჩინეთიდან გვაქვს ძალიან დიდი ზრდა. გარდა იმისა, რომ თვითონ ციფრები ძალიან შთამბეჭდავია, მას შემდეგ, რაც პირდაპირი რეისი დაინიშნა თბილისი-შანხაი-თბილისის მიმართულებით, არცერთი რეისი არ ყოფილა, რომ 98-99% არ ყოფილიყო სრულად დატვირთული.

ახლაც ჩემი გუნდის თანამშრომლები არიან პეკინში, road show გვაქვს. ჩვენ ორ ნაწილად გვქონდა ჩინეთი გაყოფილი: მაისში - შანხაი და მიმდებარე ქალაქები, პეკინი კი ახლა გვაქვს. თქვენ ნახეთ დიდი გარე რეკლამები, ბიზნესთან შეხვედრები. ტრადიციულ მედიაშიც, CCTV-ზე, გვქონდა გარკვეული გადაცემები და რეკლამები.

ბოლო პერიოდში, განსაკუთრებით ბოლო 2 წლის განმავლობაში, ჩვენ ასეთი მსხვილი მარკეტინგული ინტერვენციები, რაც გულისხმობს მრავალმხრივ, მრავალშრიან კამპანიებს, ასე აქტიურად დავიწყეთ და ნამდვილად ასეთი შედეგიც მივიღეთ.

ასევე ხაზი მინდა გავუსვა ევროკავშირის ქვეყნებს და დიდ ბრიტანეთს. აქაც, შარშან, დიდი ბრიტანეთიდან პირდაპირი რეისების დამატებამ არნახული შედეგი მოგვცა. ყოველთვის სავსეა ბორტი და სავსეა ბრიტანელებით.

იგივე შედეგი გვაქვს გერმანიიდან, პოლონეთიდან. ისრაელიდან გვქონდა ძალიან დიდი ზრდა მესამე კვარტალში, რაც სამი კვარტლის ჭრილში ძალიან პოზიტიურ მაჩვენებლებს აჩვენებს.

აქაც მინდა ხაზი გავუსვა, რომ ევროკავშირიდან და ბრიტანეთიდან ყოველ კვარტალში და წლიდან წლამდე რაღაცნაირად საკუთარი რეკორდი იხსნება, იმიტომ რომ, თუ ვთქვათ, ვამბობდი, რომ არასოდეს ამდენი ევროპელი საქართველოში არ ჩამოსულა, ახლა იგივეს ვიძახი, ოღონდ წინას კვლავ გადავუსწარით და ძალიან დიდი ოდენობა გვყავს როგორც ვიზიტორების, ისე შემოსავლების თვალსაზრისით. ევროკავშირი შემოსავლების ერთ-ერთი მნიშვნელოვანი წყაროა.

ბრიტანეთში გვქონდა ძალიან აქტიური კამპანიები, ახლაც მიმდინარეობს როგორც გარე რეკლამა, ისე რეპუტაბელურ მედიებში სტატიები, გადაცემები, სიუჟეტები თუ რეკლამის გაშვება.

შემოდგომაზე გვქონდა ევროპაში ვრცელი კამპანია. ბერლინში, მიუნხენში, სკანდინავიის ქვეყნებში გვქონდა ძალიან საინტერესო აქტივობები. აქაც აღსანიშნავია, რომ ნორვეგიასთან პირდაპირი ფრენები გვაქვს. მთლიანად სკანდინავიის ქვეყნებში, ქალაქებში, ოსლოშიც და ბევრგან გვქონდა აქტივობები.

ეს მარტო ჩვენი შეფასება არ არის, რა თქმა უნდა, ციფრები თავისას საუბრობს, მაგრამ ასევე აღსანიშნავია კერძო სექტორი, რომელიც ჩვენთან ერთად მონაწილეობს ამ ღონისძიებებში ქვეყნის პრეზენტაციებსა თუ ბიზნესთან ბიზნესის დაკავშირებაში.

განსაკუთრებით, ჩინეთი და ინდოეთი არ შეიძლება გამოგვრჩეს, იმიტომ რომ იქაც ძალიან საინტერესო მიმართულებებს ვავითარებთ. ვფიქრობ, რომ მთლიანობაში წლევანდელი წელი ძალიან დახუნძლული იყო.

არ არის ჩვენთვის არცერთი სეზონი ისეთი, რომ ამოსუნთქვის შესაძლებლობა გვქონდეს. უკვე ზამთრის სეზონისთვის მზადება დავიწყეთ და, როდესაც ჩვენ მარკეტინგზე ვსაუბრობთ, სეზონიდან სეზონამდე, რა თქმა უნდა, ე.წ. კონტენტის, ანუ შინაარსის ცვლილება მიმდინარეობს და ახლა ჩვენ უკვე დავიწყეთ ზამთრის სეზონის პოპულარიზაცია“, - აცხადებს მაია ომიაძე.