დარგობრივი ეკონომიკისა და ეკონომიკური პოლიტიკის კომიტეტმა „საავიაციო ობიექტებთან დაკავშირებით მოძრავი მოწყობილობების მიმართ საერთაშორისო გარანტიების შესახებ" კონვენციის ძალაში შესვლის პროცედურების დასრულების უზრუნველყოფის მიზნით, მის მიმართ გასაკეთებელი დეკლარაციების პროექტი განიხილა.

მომხსენებლის, ეკონომიკისა და მდგრადი განვითარების მინისტრის მოადგილის მარიამ ქვრივიშვილის განცხადებით, კონვენციის მთავარი მიზანია თვითმფრინავებისა და სხვა საავიაციო მოწყობილობების შესყიდვის, იჯარის ან ლიზინგის შემთხვევაში, ფინანსური რისკების შემცირება.

როგორც მინისტრის მოადგილემ აღნიშნა, კონვენციის განუყოფელ ნაწილს წარმოადგენს ოქმი, რომელიც  ავიაციის სფეროში გარანტიების ქმედით მექანიზმებს აწესრიგებს. მისივე თქმით, კონვენციასა და ოქმთან შეერთების პროცედურების დასრულების მიზნით, მიზანშეწონილია ცვლილება შევიდეს საქართველოს პარლამენტის 2007 წლის 6 ნოემბრის დადგენილებაში და დადგენილების მეორე პუნქტი ჩამოყალიბდეს დეკლარაციების ახალი რედაქციის გათვალისწინებით. 

„კონვენციაზე შეერთებით გაუმჯობესდება ჩვენი ქვეყნის პოზიციონირება საერთაშორისო საავიაციო ინდუსტრიაში. კონვენცია ახდენს სამართლებრივი სტანდარტების ჰარმონიზაციას, რაც ამარტივებს ტრანსნაციონალურ ლიზინგს და ფინანსურ ოპერირებას. შესაბამისად, საქართველო წარმოჩინდება როგორც საიმედო პარტნიორი საერთაშორისო ავიაბაზრისთვის, რაც თავის მხრივ, ხელს შეუწყობს ინვესტიციების მოზიდვას საავიაციო სექტორში", - განაცხადა მარიამ ქვრივიშვილმა.

სხდომაზე განხილულ საკითხს კომიტეტმა მხარი დაუჭირა.