“შრომითი მიგრაციის” შესახებ საქართველოს კანონით, უცხოელი გიდებისთვის სპეციალური შეზღუდვები დაწესდა. კულტურული გიდების მიმართულებით უცხოელებისთვის კვოტირება ნულოვანი დარჩა. არსებულ გამოწვევებზე სამსჯელოდ ტურიზმის ეროვნულმა ადმინისტრაციამ სექტორის წარმომადგენლები შეკრიბა და მათთან ერთად „შრომითი მიგრაციის შესახებ” საქართველოს კანონში მიღებული ცვლილებისა და აღსრულების მექანიზმის შესახებ იმსჯელეს.

როგორც ტურიზმის ეროვნული ადმინისტრაციის ხელმძღვანელმა მაია ომიაძემ ტელეკომპანია „მაესტროს“ ეთერში გადაცემა Business Insider Georgia-ში სტუმრობისას განაცხადა, ტურიზმის სფეროში გიდების რეგულაციების საკითხის განხილვის საჭიროება, მათ შორის უცხოელი გიდების საქმიანობის შესაძლო შეზღუდვასთან დაკავშირებით, ასოციაციებთან კონსულტაციების შედეგად გაჩნდა. მისი თქმით, მთავარი გამოწვევა ქართველი გიდების მხრიდან კონკურენციის არათანაბარ პირობებზე უკავშირდება, როდესაც ტურისტული კომპანიები ჯგუფებთან ერთად საკუთარ უცხოელ გამყოლ გიდებსაც შემოჰყავთ.
„პირველ რიგში რატომ გახდა საჭირო ეს შეხვედრა და ზოგადად ამ საკითხის ინიცირება. ჯერ კიდევ იმ პერიოდში, როდესაც კანონზე მუშაობა მიმდინარეობდა (ტურიზმის კანონზე ვსაუბრობ), იქ იყო ვთქვათ გარკვეული საკითხები, რომელიც გიდების რეგულაციებს ეხებოდა - იქნებოდა ეს სავალდებულო სერტიფიცირება, რეგისტრაცია თუ ლიცენზირება. იქაც მოხდა ასოციაციებთან ერთად ამ თემის დამუშავება და იმთავითვე გიდების მოთხოვნა იყო ის, რომ უცხოელებისთვის ყოფილიყო გარკვეულწილად შეზღუდვა.

მთავარი გულისტკივილი ამ თემაზე იყო ის, რომ უცხოელი გიდები, ან გამყოლ​ი გიდები, მათ სამუშაო ადგილს ართმევდნენ. როდესაც კომპანიებს შემოჰყავთ ტურისტული ჯგუფები, თუ აქ შესაბამისი რეგულაცია კანონის არ იქნებოდა, უპირატესად ისინი თავიანთ გამყოლ გიდებს თუ კულტურულ გიდებს ასახელებდნენ და პირობითად, ნებისმიერი ქვეყნიდან, მაგალითად ისრაელიდან თუ მოჰყავდათ ჯგუფი, გიდიც მოჰყვებოდათ. რა თქმა უნდა, ქართველი გიდები ყოველთვის ამბობდნენ, რომ მათ კონკურენციის პირობებში უწევდათ ყოფნა არა მხოლოდ პროფესიულად, არამედ აი ამ დაურეგულირებელი პირობებით.

თავდაპირველად ამაზე როდესაც იყო საუბარი, რა თქმა უნდა, ჩვენ არ ვიცოდით, რამდენად საერთო იყო ეს ბიზნესის ხმა. რასაკვირველია, შეიძლება ერთმა-ორმა სექტორის წარმომადგენელმა მოსაზრება დააფიქსიროს, მაგრამ ერთია, როდესაც უკვე საუბარია იმაზე, რომ უნდა იყოს განხილული სრულად სექტორთან, იმისთვის რომ სახელმწიფომ ამ შემთხვევაში კონკრეტული კანონის ფარგლებში შეძლოს და ბიზნესის საერთო ხმა გაითვალისწინოს. სწორედ ამიტომ, ერთ-ერთ შეხვედრაზე, როდესაც ჩვენ ვსაუბრობდით აი ამ გამოწვევებთან დაკავშირებით, იქ წამოიჭრა საკითხი, ხომ არ შექმნიდა უახლოეს პერიოდში კანონი, რომელიც ძალაში შევიდოდა, გარკვეულ ეროვნებებზე თუ ენებზე დეფიციტს (მაგალითად ჩინურენოვანი). საბოლოო ჯამში შეხვედრით გაირკვა, რომ ჯერჯერობით დანაკლისი არ არის. სწორედ ეს გახდა მიზეზი იმისა, რომ შეხვედრა ჩაგვეტარებინა“, - აღნიშნა მაია ომიაძემ.

მისივე თქმით, საქართველოში არსებობს ოფიციალურად დარეგისტრირებული 4 ასოციაცია (ოთხივე გიდების ასოციაციაა) და ერთი პროფკავშირი, რომელიც აერთიანებს საკმაოდ დიდი რაოდენობის გიდებს, მძღოლ-გიდებს და სხვადასხვა ტიპის მომსახურეებს. 
„ჩვენ ვთხოვეთ სექტორს, რომ თავად ყოფილიყვნენ წარმოდგენილნი იმდენი ადამიანით, რამდენიც სურდათ. საკმაოდ წარმომადგენლობითი შეხვედრა იყო - ჩამოსულები იყვნენ ასოციაციის წარმომადგენლები აჭარიდან და დასავლეთ საქართველოდან (ქუთაისიდან). შეხვედრაზე გაიმართა მსჯელობა იმაზე, ხომ არ ჯობდა გვეცადა, გარკვეული დროით დაგვეტოვებინა ნულოვანი კვოტა და შემდეგ დაგვემატებინა. აღსანიშნავია ის ფაქტი, რომ თვითონ კანონი იძლევა შესაძლებლობას, რომ წლიდან წლამდე გადახედოს კვოტირებას. პირობითად ვამბობ, თუ ჩვენ წლის ბოლომდე ვტოვებთ ნულოვან კვოტას უცხოენოვან კულტურულ გიდებზე, ამ ეტაპზე ოთხივე ასოციაცია და პროფკავშირები შეთანხმდნენ, რომ არ საჭიროებს ეს ბაზარი დამატებით კვოტებს უცხოელ გიდებზე“, - აღნიშნა მაია ომიაძემ.

ტურიზმის ეროვნული ადმინისტრაციის ხელმძღვანელის თქმით, მაღალი რისკის შემცველი გიდი არის გიდი, რომელსაც რეალურად მთაში მიჰყავს ადამიანი - ვთქვათ მყინვარზე. 

„რა თქმა უნდა, როდესაც ადამიანის სიცოცხლესთან არის დაკავშირებული და ექსტრემალურ გარემოში მიჰყავს, მას სხვა დამატებითი უნარები სჭირდება. ტურიზმის კანონის თანახმად სავალდებულო ხდება, ლიცენზირებადი და სერტიფიცირებადი ხდება მთაში გამყოლი მაღალი რისკის შემცველი მომსახურება. როდესაც ჩვენ ვსაუბრობთ მაღალი რისკის შემცველ გიდებზე, ასეთ ასოციაციასთან (რომელიც თემატური ასოციაციაა და ევროპის ასოციაციის წევრია) კონსულტაციით მივედით იმ დასკვნამდე, რომ აი ამ სფეროში საკმარისი რაოდენობა სერტიფიცირებული, კვალიფიციური გიდების საქართველოში არ არსებობს იმ მოთხოვნაზე, რაც გვაქვს მთაში სიარულზე. ამიტომ, მათთან კონსულტაციით წელს დავუშვით 200-მდე უცხოელი გიდის კვოტირება. ჩვენ შევხედავთ, იქნება ეს ზედმეტი თუ საკმარისი და ამის მიხედვით კვლავ ასოციაციასთან შეთანხმებით მომავალ წელს მაღალ რისკს დავაკორექტირებთ. ნულოვანი კვოტა რჩება კულტურულ გიდებზე“. - აღნიშნა მაია ომიაძემ.