ტურიზმის ეროვნული ადმინისტრაციის ხელმძღვანელის მაია ომიაძის განცხადებით, ტურიზმის სექტორში მიმდინარე B2B შეხვედრები და საერთაშორისო ღონისძიებები ახალი ბაზრების ათვისებისა და საქართველოს ტურისტული შესაძლებლობების წარმოჩენის მნიშვნელოვან შესაძლებლობას ქმნის. როგორც მან ტელეკომპანია „მაესტროს“ ეთერში გადაცემა Business Insider Georgia-ში სტუმრობისას აღნიშნა, სახელმწიფო და კერძო სექტორის ერთობლივი ძალისხმევა მიზნად ისახავს ბაზრების დივერსიფიკაციას და გლობალური ტურისტული რყევების გავლენის შემცირებას, თუმცა არსებული გეოპოლიტიკური ფაქტორების ფონზე ბაზრების სრულ ჩანაცვლებას მოკლევადიან პერიოდში ვერ ექნება სწრაფი ეფექტი.

„თუ არ განვავითარეთ, ერთი მხრივ, ახალი ბაზრები და, მეორე მხრივ, კონკურენტუნარიანი შეთავაზებები, სექტორი წინ ვერ წავა. მით უმეტეს ისეთ მძაფრ კონკურენტულ გარემოში, რომელსაც რეგიონში არსებული კონფლიქტებიც ემატება.

მიუხედავად მსოფლიო ტურიზმის ინდუსტრიაში მოსალოდნელი რყევებისა, გვჯერა, რომ ბაზრების ჩანაცვლებით, დამატებითი აქტივობებითა და კერძო სექტორთან ერთობლივი ღონისძიებებით, შევძლებთ მაქსიმალურად შევამსუბუქოთ ნეგატიური გავლენა.

რა თქმა უნდა, ნეგატიურ გავლენას სრულად ვერ აღმოვფხვრით. თუ გადავხედავთ ჩვენი ვიზიტორების ტოპ ათეულსა თუ თხუთმეტეულს, იქ ყოველთვის ფიგურირებენ ახლო აღმოსავლეთის ქვეყნები. ბუნებრივია, მათი ერთი ხელის მოსმით, ერთ თვეში ჩანაცვლება შეუძლებელია. თუმცა, ეს სულაც არ ნიშნავს იმას, რომ ბაზრების მნიშვნელოვანი და ეფექტიანი გადათამაშება ვერ მოხდება“, - აცხადებს მაია ომიაძე.