საქართველოსთვის კულტურული ტურიზმი ყოველთვის იყო და რჩება უმთავრეს პრიორიტეტად, რომელიც სათავგადასავლო ტურიზმთან ერთად, სტატისტიკურ მონაცემებში მუდმივად პირველ ადგილს იკავებს, - აცხადებს საქართველოს ტურიზმის ასოციაციის თავმჯდომარე ნატა კვაჭანტირაძე, რომელიც ტელეკომპანია „მაესტროს“ ეთერში გადაცემა Business Insider Georgia-ს სტუმარი იყო.

ნატა კვაჭანტირაძის განცხადებით, პანდემიის შემდეგ ტურისტების მოთხოვნები შეიცვალა და განსაკუთრებული აქცენტი გამოცდილებით ტურიზმზე კეთდება. 

„სტატისტიკურ მონაცემებში პირველ ადგილს მუდმივად იკავებს როგორც კულტურული, ისე სათავგადასავლო ტურიზმი. თუმცა, პანდემიამ გარკვეულწილად შეცვალა ტურისტების მოთხოვნები. შესაბამისად, დღეს ძალიან დიდი აქცენტი კეთდება ახალ მიმართულებაზე - არის გამოცდილებითი ტურიზმი. იგი გულისხმობს მოგზაურების პირდაპირ შემხებლობას ქვეყნის მოქალაქეებთან და სოფლის მეურნეობის წარმომადგენლებთან. თავისთავად, ტურიზმი და სოფლის მეურნეობა მჭიდროდ არის დაკავშირებული ერთმანეთთან.

გვაქვს ძალიან კარგი მაგალითები ღვინისა და ეკოტურიზმის მიმართულებით, თუმცა ამ პროდუქტებს კიდევ უფრო მეტი გამრავალფეროვნება სჭირდება. ხშირად აღვნიშნავთ, რომ კომბინირებული შეთავაზებები ბევრად მეტ ეფექტს იძლევა. თუნდაც მაშინ, როცა კულტურულ ტურიზმზე ვსაუბრობთ, აუცილებელია სხვადასხვა მიმართულების კომბინაცია. ტურისტული პროდუქტები უნდა იყოს მრავალფეროვანი, რათა ჩვენი ქვეყანა კიდევ უფრო საინტერესო გავხადოთ. ჩვენი მრავალფეროვნება, როგორც ბიომრავალფეროვნების, ისე კულტურისა და ისტორიის ჭრილში, შეთავაზებების ნაწილში ბევრად უფრო მიმზიდველი უნდა გახდეს სტუმრებისთვის“, - აღნიშნა საქართველოს ტურიზმის ასოციაციის თავმჯდომარემ.