ტურისტული კომპლექსი Dakidula • დაკიდულა მართალია გასულ წელს გაიხსნა, თუმცა რაჭის სავიზიტო ბარათად უკვე იქცა. პანორამული ხედები, კომფორტული კოტეჯები და გემრიელი სამზარეულო - აქ ყველაფერია მყუდრო და წყნარი დასვენებისთვის. 

„დაკიდულა“ ამბროლაურის მუნიციპალიტეტში, სოფელი ბოსტანაში მდებარეობს და დასაქმებული ჰყავს დაახლოებით 12 ადამიანი. როგორც ტურიზმის ეროვნული ადმინისტრაციის მიერ მოწყობილი პრესტურის ფარგლებში გამართულ შეხვედრაზე „დაკიდულას“ თანადამფუძნებელმა ზურაბ მანჯგალაძემ Business Insider Georgia-ს განუცხადა, „დაკიდულას“ რამდენიმე დღეში ახალი სერვისები დაემატება.

„დაკიდულა“ აერთიანებს 9 კოტეჯს, რომელიც 2 პერსონაზე არის გათვლილი. თუმცა ზოგიერთ კოტეჯში გვაქვს იმის შესაძლებლობა, რომ +1 სტუმარი მივიღოთ. მთლიანობაში ერთდროულად, მაქსიმუმ 23 სტუმრის მასპინძლობა შეგვიძლია.

„დაკიდულა“ გაიხსნა გასულ წელს და ამ ეტაპზე შემოვიფარგლებით კოტეჯებითა და რესტორნით. თუმცა მალე დაგვემატება ფუდკორტი. ეს იქნება სივრცე, სადაც იქნება მუსიკა, ბორდგეიმები, კოქტეილები და ასე შემდეგ“ - განმარტავს ზურაბ მანჯგალაძე.

„დაკიდულას“ მშენებლობისთვის 1,5 მლნ ლარზე მეტის ინვესტიციაა განხორციელებული. „დაკიდულას“ საქმიანობა არის სეზონური,  თუმცა მენეჯმენტის სურვილია, რომ ის 4 სეზონზე გათვლილი ობიექტი იყოს. 

„შარშან ჩვენი ობიექტი გაიხსნა ივლისში და რა თქმა უნდა პირველივე წელს არ გვქონდა მაღალი ცნობადობა. იყო სხვა ფაქტორებიც, რაც ჩვენზე მოქმედებდა. თუნდაც ის, რომ იყოს ევროპის ჩემპიონატი და დიდი ნაკადი საქართველოდან გავიდა. წლევანდელ წელს რაც შეეხება დამსვენებლებმა საგრძნობლად მოიმატა. ამ დროისათვის ქართველი და უცხოელი დამსვენებლების თანაფარდობა 50/50-ზეა. შედარებისთვის გეტყვით, რომ 2024 წლის ივნისში გვყავდა 15 სტუმარი, ხოლო წელს 97 სტუმარი. რაც შეხება ივლისს მათი რაოდენობა ჩვენს მაგალითზე თითქმის 5-ჯერ მეტია. გასულ წელს ჩვენთვის ყველაზე დატვირთული იყო აგვისტოს თვე, და წელს აგვისტოზე 70%-მდე უკვე დაჯავშნილია.

მიმდინარე წელს უკვე 14 სხვადასხვა ქვეყნიდან ვუმასპინძლეთ სტუმრებს. ევროპის თითქმის ყველა ქვეყნიდან მივიღეთ სტუმარი. უცხოელი დამსვენებლები საშუალოდ 2-3 ღამეს იღებენ. ივლისში კოტეჯის ღირებულება 250 ლარი იყო, თუმცა აგვისტოზე უკვე 270 ლარია. ფასები არის კვების გარეშე, ხოლო კვების ჩათვლით თანხას 30 ლარი ემატება. სტუმარს ასევე შეუძლია რესტორნის მენიუდან აირჩიოს სასურველი კერძები.

წელს სეზონი დავიწყეთ 1 ივნისს და ალბათ ოქტომბრის ბოლომდე ვიმუშავებთ. გვინდა, რომ ოთხივე სეზონზე ვიმუშაოთ, თუმცა ჯერჯერობით ამის საშუალება ნაკლებადაა“, - ამბობს „დაკიდულას“ თანადამფუძნებელი.

„დაკიდულა“ წელს რესტორანს უკვე საკუთარი ღვინითაც მოამარაგებს. ტურისტული ობიექტის გარშემო 2,5 ჰა ფართობზე 10 ათასი ძირი ვენახია გაშენებული, რომლის პირველ მოსავალსაც წელს ელოდებიან. წინასწარი გათვლებით 4 ტონა ყურძნის მოსავალზე აკეთებენ პროგნოზს, რომლის გადამუშავების შედეგადაც მიღებულ ღვინოს მთლიანად საკუთარ რესტორანში გაყიდიან.