გლობალური გამოწვევების მიუხედავად, ტურიზმის სექტორში მდგომარეობა ეტაპობრივად სტაბილურდება, - ამის შესახებ ტელეკომპანია „მაესტროს“ ეთერში გადაცემა Business Insider Georgia-ში სტუმრობისას კომპანია HSC Group Hospitality-ის დირექტორმა, გიორგი დოლიძე განაცხადა. მისი თქმით, ახლო აღმოსავლეთში განვითარებულმა მოვლენებმა ყველაზე დიდი უარყოფითი გავლენა მარტში იქონია, თუმცა ამ ეტაპზე ბაზარი აღდგენის ნიშნებს აჩვენებს და ისრაელიდან ტურისტული ნაკადიც ნაწილობრივ უკვე განახლებულია.

„რა თქმა უნდა, როდესაც ასეთ გლობალურ საკითხთან გაქვს შეხება, აქ, როგორც ადრე, ისე დღესაც, შეიძლება რაღაც-რაღაცები ვარაუდის დონეზე თქვა და გამოთქვა. ყველაზე დიდი გავლენა და დიდი უარყოფითი ეფექტი მარტის თვის ჭრილში, მარტთან მიმართებით გვქონდა. რაც შეეხება დღეს, ნაწილობრივ ისრაელიდან, მინიმალური დოზით, მაგრამ მცირედი, მცირედი აქტივობა უკვე შეინიშნება, რაც, მოლოდინების კუთხით, შეიძლება დადებით განწყობას ქმნიდეს. საამიროებიდან საკმაოდ გააქტიურებულია რეზერვაციების ნაკადი, რაც ასევე გასახარია. ამ ეტაპისთვის ძირითად ბაზრებად მაინც ნარჩუნდება ევროპა, ჩვენი მეზობელი ქვეყნები, ჩინეთი, კორეა და აზიისა თუ ახლო აღმოსავლეთის სხვადასხვა მიმართულებები, რომლებიც აქამდეც ძალიან აქტიურად იყვნენ დაინტერესებული საქართველოში მოგზაურობით და ეს მაჩვენებელიც წლიდან წლამდე მზარდი იყო.

მაშინ, როდესაც ორი ძირითადი მიმართულება ერთგვარ მასას ქმნის საქართველოსთვის და ისტორიულადაც, ისევე როგორც სამომავლოდ, ძალიან დიდი აქცენტი, რა თქმა უნდა, კეთდება საამიროებზე, ასევე ვიცით, რომ სტატისტიკურად ისრაელი არის ჩვენი ერთ-ერთი მთავარი პარტნიორი ტურისტული ნაკადების შემოდინების მხრივ ცალსახად მნიშვნელოვანია სეზონისთვის, რომ ეს მიმართულებები რაც შეიძლება მალე აღდგეს სრულად.

სრულ აღდგენას, სამწუხაროდ, ჯერ კიდევ ვერ ვუსვამთ წერტილს, თუ როდის შეიძლება მოხდეს, თუმცა, ისევ და ისევ, იმ იმედზე ვართ დამოკიდებული, რომ სეზონზე მაინც ივნისიდან, ასე ვთქვათ - არ დავკარგავთ იმ ნაკადებს, რომლებიც საქართველოში უნდა შემოვიდეს.

ასევე აღსანიშნავია ის ფაქტი, რომ მარტში, როდესაც ძირითადი ესკალაცია მოხდა, დაბალი სეზონი იყო. დაბალ სეზონზე ისტორიულად და სტატისტიკურად ისრაელისა და საამიროების მიმართულებები საკმაოდ აქტიურობდნენ ხოლმე და, ასე ვთქვათ, ერთგვარი შემავსებელი გვქონდა ამ პერიოდში.

თითოეული რეზერვაციის დაკარგვა და გაუქმება გაცილებით უფრო მტკივნეულია, ვიდრე მაღალ სეზონზე. ახლა მაღალი სეზონი ფაქტობრივად კარსაა მომდგარი, წამოგვეწია. აპრილი, როგორც ვთქვით, დავხურეთ მაღალი სეზონისთვის დამახასიათებელი პროცენტული მაჩვენებლით.

ვფიქრობთ, რომ მთლიანობაში სეზონი, მიუხედავად აღდგენის ვადის ჯერჯერობით გაურკვევლობისა, მაინც ცოტათი აჯობებს გასული წლის პერიოდს. აქვე მნიშვნელოვანია ისიც, რომ კამპანიები ძალიან გააქტიურებულია სხვადასხვა მიმართულებით“, - აცხადებს გიორგი დოლიძე.