ვერაზე, თბილისის სახელმწიფო საკონცერტო დარბაზის, ფილარმონიის გვერდით მდებარე სასტუმრო „აფიშამ“ ერთი წლის იუბილე აღნიშნა. როგორც Business Insider Georgia-სთან სასტუმროს დირექტორმა, ქეთი ნადარეიშვილმა განაცხადა, ცნობადობის ზრდასთან ერთად, მნიშვნელოვნად გაიზარდა სტუმრების რაოდენობაც.

„აფიშა“ სექტემბერში 1 წლის გახდა. ზაფხულში სტუმრების რაოდენობა გაზაფხულთან შედარებით 30%-ით გაიზარდა. ახალი წლის დღეებზე ნომრების ნახევარზე მეტი უკვე დაჯავშნილია, რაც ჩვენი გუნდისთვის ძალიან სასიხარულო ფაქტია. ჩვენ ძირითადად ინდივიდუალურ სტუმრებზე ვართ ორიენტირებული, ამავდროულად ტურისტულ ჯგუფებსაც აქტიურად ვმასპინძლობთ. 

სამიზნე აუდიტორიაა ინდივიდუალური ტურისტი და კორპორატიული სეგმენტი, რადგან სასტუმროს აქვს საკონფერენციო სივრცეები და მაღალი დონის მომსახურება. “აფიშას” დიზაინი განსხვავებულია, რაც სტუმრებისთვის დამატებით ინტერესს იწვევს. ზაფხულიდან მოყოლებული, მრავალ ტურისტულ ჯგუფს ვუმასპინძლეთ - მათ შორის უკრაინიდან, პოლონეთიდან, ჩინეთიდან, თურქეთიდან, ისრაელიდან და ევროპის სხვადასხვა ქვეყნებიდან ,გერმანია, უნგრეთი, დიდი ბრიტანეთი. აქტიურად გვყავს სტუმრები მეზობელი და დსთ-ს ქვეყნებიდანაც. აღსანიშნავია, რომ სასტუმრომ სახელი უკვე გაითქვა სომხეთსა და აზერბაიჯანში, საიდანაც ვიზიტორების ზრდას ვხედავთ,“ - ამბობს სასტუმროს დირექტორი. 
მისი თქმით, წლის ბოლო პერიოდში განსაკუთრებით გააქტიურებულია ადგილობრივი კორპორაციული სეგმენტი, რაც სასტუმროში წვეულებებისა და სხვადასხვა ღონისძიებების მატებას იწვევს.

„გასულ წელთან შედარებით, კორპორაციული სეგმენტის მიმართულებით მნიშვნელოვანი ზრდა გვაქვს - დაახლოებით 180%-ით,  ასევე მოიმატა ნომრების დატვირთულობამ. ადგილობრივი მაცხოვრებლების მხრიდან გახშირდა ჩვენს სივრცეში სხვადასხვა ღონისძიებების გამართვა, რაც  გვახარებს. ჩვენი მიზანია, რომ "აფიშას" ცნობადობა ადგილობრივ სეგმენტშიც კიდევ უფრო გაიზარდოს. სწორედ ამიტომ დავამატეთ დილის იოგა, რომელიც სრულიად უფასოა - როგორც სასტუმროს სტუმრებისთვის ისე ნებისმიერი მსურველისთვის“ - დასძინა ქეთი ნადარეიშვილმა.

სასტუმროს ინფორმაციით, პირდაპირი ავიამიმოსვლის ზრდამ და თბილისის საერთაშორისო აეროპორტში დამატებულმა რეისებმა დადებითი გავლენა იქონია ჰორეკა სექტორზე.

„ტურისტების რაოდენობა გაზრდილია როგორც ბრიტანეთიდან ასევე უზბეკეთიდან, თურქეთიდან და ჩინეთიდან - განსაკუთრებით ტურისტულ ჯგუფების მიმართულებით. ნებისმიერი ახალი პირდაპირი რეისი ხელს უწყობს შესაბამისი ქვეყნებიდან ვიზიტორების მატებას. ბოლო პერიოდში თბილისი მნიშვნელოვად გააქტიურდა მაღალი დონის სასტუმროების გახსნის მიმართულებით, რამაც კონკურენციაც გაზარდა, თუმცა მაღალი სეზონის პერიოდში ეს ნაკლებად იგრძნობა. 

სასტუმრო „აფიშას“ უპირატესობა მის დიზაინსა და კონცეფციაშია. გარდა ამისა, გვაქვს სპა-სივრცე მცირე აუზითა და მასაჟის ოთახებით - რაც დიზაინ სასტუმროებში იშვიათობაა. სასტუმროს Bubble Bar ტერასიდან იშლება ულამაზესი ხედები, სადაც ნებისმიერ მსურველს შეუძლია სტუმრობა. 
ჩვენს Brasserie  რესტორანში წარმოდგენილია როგორც ქართული ისე ევროპული მენიუ, განსაკუთრებული აქცენტით ქართულ ღვინოებზე. საუზმე ხელმისაწვდომია დილის 07:00 საათიდან, რაც ასევე იშვიათია თბილისში.
ჩვენი თანამშრომლები სრულყოფილად ფლობენ ინფორმაციას ქალაქის კულტურულ ცხოვრებაზე - დაგეგმილ ღონისძიებებზე და გამოფენებზე. აქტიურად ვთანამშრომლობთ სხვადასხვა კულტურულ დაწესებულებებთან  და მათ აფიშებს ვათავსებთ ჩვენ სივრცეში, რათა სტუმრებმა უკეთ გაიცნონ თბილისის კულტურული მემკვიდრეობა,“ - აღნიშნავს ქეთი ნადარეიშვილი.

„აფიშა“ 118 ნომრიანი ხუთვარსკვლავიანი სასტუმროა, რომლის ინტერიერზე და კონცეფციაზე იმუშავეს დიზაინერმა ესმა ხეცურიანმა და კრეატიულმა კომპანია “გასტრონავტმა“. 
ვინტაჟის და თანამედროვე ხელოვნების ჰარმონიული შერწყმა, ინტერიერის ევროპულ და ამერიკულ ხასიათს გამოხატავს. 

სასტუმროს თითოეული კუთხე, დეტალი და დიზაინერული გადაწყვეტა, სტუმარს სანახაობისთვის ამზადებს .

ამ განსაკუთრებული ხასიათისა და გუნდის ნაყოფიერი შრომის შედეგად "აფიშა" MICHELIN Guide-ის რჩეულ სასტუმროებს შორის მოხვდა, რაც სასტუმროსთვის  მნიშვნელოვანი აღიარება და საამაყო ფაქტია .