შეკვეთილში მდებარე სასტუმრო „მირაჟში“ ზაფხულის ტურისტული სეზონი აქტიურ ფაზაშია. სასტუმროს წარმომადგენლის ბარბარე მახარაძის შეფასებით, 20 ივლისიდან მოთხოვნა საგრძნობლადაა გაზრდილი. სასტუმროს სტუმრებს შორის საქართველოს მოქალაქეები და უცხოელი ტურისტები თითქმის თანაბრად არიან წარმოდგენილი.

“სტუმრების დაახლოებით 45% ქართველია, 20% – სომხეთიდან, 20% – ბალტიის ქვეყნებიდან, ხოლო დარჩენილი 15% ევროპის სხვადასხვა ქვეყნიდან. სტუმრები ძირითადად ერთ კვირამდე პერიოდით რჩებიან,“ – აღნიშნავს ბარბარე მახარაძე.

სასტუმროს წარმომადგენლის განცხადებით, ზაფხულის დასაწყისში არასტაბილურმა ამინდებმა სტუმრების ნაკადზე გარკვეული გავლენა იქონია, თუმცა აგვისტოსთვის ნომრების უმეტესობა უკვე წინასწარ არის დაჯავშნილი და სეზონის ყველაზე მაღალი აქტივობა სწორედ ამ პერიოდშია მოსალოდნელი. მისი შეფასებით, სასტუმროს მაღალ დატვირთულობას საქართველოს ტურიზმის ეროვნული ადმინისტრაციის ღონისძიებები მნიშვნელოვნად უწყობს ხელს.

„სტუმრების სტაბილური ნაკადი და პოზიტიური გამოხმაურებები გვაძლევს საფუძველს, მიმდინარე სეზონი წარმატებულად შევაფასოთ. აგვისტოსთვის სასტუმრო უკვე სრულიად დატვირთულია და ნომრების უმეტესობა წინასწარ არის დაჯავშნილი. ველოდებით, რომ სეზონის ყველაზე აქტიური სწორედ ამ პერიოდში იქნება. ვფიქრობთ ჩვენთვის აქტიურ სეზონს რამდენიმე ფაქტორი განაპირობებს, მათ შორის სასტუმროს მრავალწლიანი რეპუტაცია და მომსახურების ხარისხი და ვიტყოდი რომ ასევე მნიშვნელოვანი როლი აქვს საქართველოს ტურიზმის ეროვნული ადმინისტრაციის მარკეტინგულ კამპანიებსა და ღონისძიებებს ზღვისპირეთში ტურიზმის გასააქტიურებლად, იქნება ეს გემო-ფესტი, დაგეგმილი კონცერტები თუ თანამშრომლების კვალიფიკაციისთვის ჩანიშნული ტრენინგ-კურსები”.- აცხადებს სასტუმრო „მირაჟის“ წარმომადგენელი.