საქართველოს ტურიზმის ასოციაციის თავმჯდომარის, ნატა კვაჭანტირაძემ განცხადებით, ტურიზმის სექტორისთვის ევროპული ქვეყნებიდან ტურისტების მოზიდვა კრიტიკულად მნიშვნელოვანია, რადგან ევროპელი მომხმარებელი საქართველოს, როგორც ტურისტული დესტინაციის მიმართ, კარგად არის გათვითცნობიერებული. როგორც ნატა კვაჭანტირაძემ ტელეკომპანია „მაესტროს“ ეთერში გადაცემა Business Insider Georgia-ში სტუმრობისას განაცხადა, ავიამიმოსვლის გაფართოება ტურიზმის სექტორისთვის გადამწყვეტ როლს ასრულებს და ბიზნესს შესაძლებლობას აძლევს, შეთავაზებები უფრო მრავალფეროვანი გახადოს. 

„დიახ, ზოგადად ჩვენი სექტორისთვის კრიტიკულად მნიშვნელოვანია ევროპული ქვეყნებიდან მომხმარებლებისა და სტუმრების მოზიდვა. ეს იქიდან გამომდინარეობს, რომ ევროპელი მომხმარებელი გარკვეულწილად ძალიან მობილიზებულია და კარგად არის გათვითცნობიერებული ჩვენს ქვეყანაზე, როგორც საინტერესო დესტინაციაზე. ამ პროცესში გადამწყვეტ როლს თამაშობს ინტენსიური ავიამიმოსვლა. ტურიზმი სწორედ ავიაციაზე დაყრდნობით მოქმედი ბიზნესია და პირდაპირი ფრენები თითოეულ კომპანიას აძლევს შანსს, მაქსიმალურად გაამრავალფეროვნოს საკუთარი შეთავაზებები.

ამის საუკეთესო მაგალითია ბოლო პერიოდის წარმატებული ინიციატივა დიდი ბრიტანეთის მიმართულებით, რამაც საგრძნობლად გაზარდა ბრიტანელი ვიზიტორების ნაკადი, როგორც კლასიკური ტურიზმის, ისე ბიზნესის თვალსაზრისით. დღეს საავიაციო მიმოსვლა მაქსიმალური დატვირთვით მუშაობს და სექტორის მხრიდან არის რეალური მოთხოვნა, რომ ფრენების სიხშირე კიდევ უფრო გაიზარდოს. ეს კიდევ ერთხელ ადასტურებს, რომ ტურისტული ბიზნესი პირდაპირ არის მიბმული ავიაციის ეფექტურობაზე, რის საფუძველზეც კომპანიები უკვე სპეციალურ, მიზნობრივ ტურისტულ პაკეტებსაც კი ქმნიან“, - ამბობს კვაჭანტირაძე.