ტურიზმის ეროვნული ადმინისტრაცია სხვადასხვა ქვეყანაში მასშტაბურ მარკეტინგულ კამპანიას ახორციელებს | მაია ომიაძე
ყვარლის მუნიციპალიტეტში საქართველოს პარლამენტის ეკონომიკური პოლიტიკის, კულტურის და რეგიონული პოლიტიკისა და თვითმმართველობის კომიტეტების ერთობლივი სხდომა გაიმართა.
სხდომაზე ტურიზმის სექტორში არსებული მდგომარეობა, მიღწეული შედეგები და განვითარების სამომავლო გეგმები მიმოიხილეს. ტურიზმის ეროვნული ადმინისტრაციის ხელმძღვანელმა, მაია ომიაძემ პარლამენტის წევრებს უწყების საქმიანობის ანგარიში წარუდგინა.
მომხსენებლის ინფორმაციით, გასულ წელს საქართველოში 7,803,239 საერთაშორისო მოგზაურის ვიზიტი შედგა, რაც 2024 წელთან შედარებით 5,9%-ით მეტია. ამასთან, 2025 წელს ტურისტული ვიზიტების რეკორდული მაჩვენებელი დაფიქსირდა და ისტორიულ მაქსიმუმს - 5,521,866 ვიზიტს მიაღწია. მისივე თქმით, 2025 წელს ევროკავშირის ქვეყნებიდან და დიდი ბრიტანეთიდან ვიზიტების რეკორდული მაჩვენებელი დაფიქსირდა.
სხდომაზე ყურადღება გამახვილდა ტურიზმის ეროვნული ადმინისტრაციის მიერ 2025 წელს განხორციელებულ პროექტებზე, რომლებიც სამიზნე ბაზრებზე საქართველოს ცნობადობის ამაღლებასა და შიდა ტურიზმის წახალისებას ემსახურება. ასევე, განიხილეს საქართველოს ტერიტორიაზე განხორციელებული და მიმდინარე ტურისტული პროგრამები და პროექტები.
მაია ომიაძის განცხადებით, ტურიზმის ეროვნული ადმინისტრაცია სხვადასხვა ქვეყანაში მასშტაბურ მარკეტინგულ კამპანიას ახორციელებს. მისივე ინფორმაციით, გასულ წელს მარკეტინგული აქტივობა 35 ქვეყანას მოიცავდა.
საუბარი ასევე შეეხო 2026 წელს დაგეგმილ ღონისძიებებს. ტურიზმის ეროვნული ადმინისტრაციის ხელმძღვანელის განცხადებით, საქართველო შანხაიში, აზიის ერთ-ერთ უმსხვილეს ტურისტულ გამოფენაზე — ITB China 2026-ზე პარტნიორი ქვეყნის სტატუსით წარდგება. ღონისძიების ფარგლებში საქართველო ფართო აუდიტორიას საკუთარ კულტურას, გასტრონომიას, ღვინოსა და ტურისტულ პოტენციალს გააცნობს.
კომიტეტების ერთობლივ სხდომაზე ტურიზმის სექტორის განვითარების მნიშვნელობაზე იმსჯელეს. საუბარი შეეხო საქართველოს რეგიონების ტურისტული პოტენციალის ათვისებასა და წარმოჩენას. აღინიშნა, რომ ქვეყნის სხვადასხვა რეგიონი გამოირჩევა უნიკალური ბუნებრივი, კულტურული და ისტორიული რესურსებით, რაც ტურისტული მიმართულებების მრავალფეროვნებისა და ახალი ტურისტული პროდუქტების შექმნის მნიშვნელოვან შესაძლებლობას იძლევა.
ხაზი გაესვა ტურიზმის განვითარებისთვის შესაბამისი ინფრასტრუქტურის გაუმჯობესების აუცილებლობასა და ხელოვნების სფეროს წარმომადგენლების ჩართულობის მნიშვნელობას. როგორც აღინიშნა, კულტურული და შემოქმედებითი რესურსების ტურისტულ პროდუქტებში ინტეგრირება ხელს უწყობს რეგიონების უნიკალური იდენტობის წარმოჩენას და კულტურული მემკვიდრეობის პოპულარიზაციას.
სხვა სიახლეები
III კვარტალში საქართველოს აეროპორტებში ტვირთისა და ფოსტის ნაკადის მოცულობამ 12.3 ათასი ტონა შეადგინა - საქსტატი
20.11.2026.17:30
2026 წლის III კვარტალში საქართველოს აეროპორტები 3.0 მილიონ მგზავრს მოემსახურა1, რაც 6.1 პროცენტით მეტია წინა წლის შესაბამისი პერიოდის მაჩვენებელზე — აეროპორტებიდან გაემგზავრა 1.5 მილიონი მგზავრი (6.0 პროცენტით მეტი), ხოლო აეროპორტებმა მიიღო 1.5 მილიონი მგზავრი (6.2 პროცენტით მეტი).
2026 წლის III კვარტალში საქართველოს აეროპორტებში მგზავრთა ნაკადის 94.0 პროცენტი რეგულარულ ფრენებზე მოდიოდა.
2026 წლის III კვარტალში საქართველოს აეროპორტებში ტვირთისა და ფოსტის ნაკადის მოცულობამ 12.3 ათასი ტონა შეადგინა, საიდანაც 88.2 პროცენტი მიღებული ტვირთი და ფოსტა იყო, ხოლო 11.8 პროცენტი — გაგზავნილი.
2026 წლის III კვარტალში საქართველოს აეროპორტებში 0.8 ათასი სატვირთო რეისი განხორციელდა, რაც 9.2 პროცენტით ნაკლებია წინა წლის შესაბამის მაჩვენებელზე.
2026 წლის III კვარტალში საქართველოს საჰაერო ტრანსპორტით გადაყვანილია 211.5 ათასი მგზავრი და გადატანილია 25.9 ათასი ტონა ტვირთი. აღნიშნულ პერიოდში გადაყვანილი მგზავრების რაოდენობა 14.4 პროცენტით ნაკლებია გასული წლის შესაბამისი პერიოდის მაჩვენებელზე, ხოლო გადატანილი ტვირთის მოცულობა 26.0 პროცენტით ნაკლებია გასული წლის შესაბამისი პერიოდის მაჩვენებელზე.