ტურიზმი, როგორც ჩვენი ეკონომიკის ერთ-ერთი მამოძრავებელი სექტორი, 2026 წელს გარკვეული გამოწვევებით შეხვდა, - განაცხადა ტელეკომპანია „მაესტროს“ ეთერში გადაცემა Business Insider Georgia-ში სტუმრობისას საქართველოს ტურიზმის ასოციაციის თავმჯდომარე ნატა კვაჭანტირაძე. მისივე განცხადებით, ტურიზმის სექტორი შიდა და გარე ფაქტორებიდან მომდინარე გამოწვევების მიუხედავად, ზაფხულის სეზონს მომზადებული ხვდება. მისი თქმით, ბიზნესები უკვე აქტიურად ემზადებიან სეზონისთვის, რასაც საერთაშორისო და ადგილობრივი მარკეტინგული ინიციატივებიც ადასტურებს, რომლებიც სექტორის წარმატებასა და აქტიურობას განსაზღვრავს.

„ტურიზმი არის მიმართულება, რომელიც მწვავედ რეაგირებს როგორც შიდა, ისე გარე ფაქტორებზე. მიუხედავად ამისა, ეს სექტორი ყოველთვის მაქსიმალურად მობილიზებულად უმკლავდება ყველა ტიპის გამოწვევას. მაგრამ მიუხედავად გარე ფაქტორებისა და გეოპოლიტიკური მდგომარეობისა, მარტის მოვლენების ფონზე, სექტორი მაქსიმალურად ცდილობს, მომზადებული შეხვდეს ზაფხულის სეზონს. სწორედ ეს პერიოდი იძლევა ეკონომიკურ ჭრილში ყველაზე დიდ შემოსავალს. სეზონი სულ მალე შევა აქტიურ ფაზაში და ბიზნესი მას სრულიად მზად ხვდება. ამაზე მეტყველებს ყველა ის საერთაშორისო თუ ადგილობრივი მარკეტინგული ინიციატივა, რომელიც პირდაპირ განსაზღვრავს ბიზნესის წარმატებასა და აქტიურობას“, - აღნიშნა ნატა კვაჭანტირაძემ.

საქართველოს ტურიზმის ასოციაციის თავმჯდომარის განცხადებით, გეოპოლიტიკური მოვლენების ფონზე გარკვეული ქვეყნებიდან შემცირებულია როგორც ფრენების სიხშირე, ისე ტურისტების ნაკადი, სექტორი აქტიურად მუშაობს სხვადასხვა ბაზრიდან მეტი სტუმრის მოსაზიდად, მათ შორის როგორც ევროპული, ისე აღმოსავლეთის ქვეყნებიდან.

ბოლო პერიოდში ხშირად საუბრობენ ბაზრების დივერსიფიკაციაზე. ეს პროცესი არ უნდა იყოს მხოლოდ ერთ კონკრეტულ ქვეყანაზე ან მიმართულებაზე მიბმული ინიციატივა. მიუხედავად იმისა, რომ გარე ფაქტორების გამო გარკვეული ქვეყნებიდან ტურისტული ნაკადები დღეს შემცირებულია, სწორედ დივერსიფიკაცია გვაძლევს ახალი შესაძლებლობების პოვნის შანსს. გეოპოლიტიკური მოვლენებიდან გამომდინარე, შეიცვალა ფრენების სიხშირეც და ტურისტების შემოდინების ტენდენციაც. სწორედ ამიტომ, დღეს შიდა რესურსებზე დაყრდნობით, სექტორი ცდილობს მოიზიდოს მეტი სტუმარი არა მხოლოდ ევროპიდან, არამედ აღმოსავლეთის ქვეყნებიდანაც. ამ სტრატეგიაზე მეტყველებს ის აქტიური მარკეტინგული კამპანიებიც, რომლებიც ბოლო პერიოდში განსაკუთრებით გაძლიერდა. ჩვენ გვჯერა, რომ ეს ძალისხმევა მალე კონკრეტულ შედეგებს გამოიღებს“, - აღნიშნა ნატა კვაჭანტირაძემ.

მისივე თქმით, რადგან ზაფხულის სეზონი მალე შევა აქტიურ ფაზაში, თითოეული ბიზნესი სრულად იქნება ორიენტირებული იმაზე, რომ ქვეყანამ რაც შეიძლება მეტი სტუმრის მიღება და მაღალი ხარისხით მასპინძლობა შეძლოს.