საფონდო ბირჟა მკვეთრ ზრდას დაუბრუნდა – რა შეიცვალა და როგორი მოლოდინებია ბაზარზე?
გიზიარებთ ბლოგს: კორექციის პერიოდი, რომელიც 2 აპრილს პრეზიდენტ დონალდ ტრამპის მიერ ტარიფების დაწესებით იყო განპირობებული, შეიძლება ითქვას, რომ დასრულებულია. მიმდინარე თვეს ამერიკული საფონდო ბირჟა მკვეთრი აღმასვლის ტენდენციას დაუბრუნდა და მაისის განმავლობაში ძირითადი ინდექსების (S&P 500, Nasdaq) ზრდის საშუალო მაჩვენებელმა 7%-ს მიაღწია.
აპრილის დასაწყისში დაფიქსირებულ მინიმალურ ნიშნულთან შედარებით, Nasdaq-ის ინდექსის შეფასება 12%-ითაა გაზრდილი, ხოლო S&P 500-ის შემთხვევაში მატების მაჩვენებელი 18%-ს აჭარბებს, რაც იმას ნიშნავს, რომ 2 აპრილის შემდეგ დაფიქსირებული კორექცია უკვე სრულად განეიტრალებულია.
ბოლო პერიოდში გამორჩეული შედეგები აქვთ უმსხვილეს ამერიკულ კომპანიებსაც, რომელთა აქციების შეფასება აპრილის მინიმუმთან შედარებით ასეა შეცვლილი:
1. Microsoft (MSFT): +26.7%
2. Apple (AAPL): +23.5%
3. Nvidia (NVDA): +37.8%
4. Amazon (AMZN): +26.3%
5. Google (GOOG): +9.8%
6. Meta (META): +35.4%
7. Berkshire Hathaway (BRK): +4.4%
8. Broadcom (AVGO): +58.9%
9. Tesla (TSLA): +50.6%
10. Walmart (WMT): +17.3%
თუკი ამ სიაში მოცემული 8 ტექნოლოგიური კომპანიის შედეგებს გავითვალისწინებთ, დავინახავთ, რომ მათ თითქმის ერთთვიან პერიოდში საშუალოდ 34%-იანი ზრდა დააფიქსირეს, ხოლო 10 უმსხვილესი კომპანიის შედეგების გათვალისწინებით, საშუალო ზრდის მაჩვენებელი 29%-ია, რაც იმას ნიშნავს, რომ იმ ინვესტორებმა, რომლებმაც კორექციით ისარგებლეს და უმსხვილესი ამერიკული კომპანიების აქციები აპრილში შეიძინეს, ერთ თვეში დაახლოებით 30%-იანი სარგებელი მიიღეს, რაც ფენომენალურ შედეგად შეიძლება ჩაითვალოს. თავად ეს შედეგი იმაზე მიუთითებს, რომ საფონდო ბირჟა სწორედ იმ ინვესტორებს აჯილდოებს, რომლებიც ნეგატიურ ემოციებს არ ემორჩილებიან და საბაზრო კორექციებს შესანიშნავ საინვესტიციო შესაძლებლობებად განიხილავენ.
საფონდო ბირჟის ზრდის განმაპირობებელ მიზეზებს რაც შეეხება, ეს ყველაფერი, პირველ რიგში, პრეზიდენტ ტრამპის მიერ 180-მდე სახელმწიფოსთვის ტარიფების შეჩერებით არის განპირობებული. ამჟამად ინვესტორებს აქვთ მოლოდინი, რომ აშშ-ის მთავრობა ყველა ქვეყანასთან სავაჭრო შეთანხმებებს გააფორმებს, რაც ტარიფების დაბრუნების რისკს მნიშვნელოვნად შეამცირებს. ამ მოსაზრებას ის ფაქტი ამყარებს, რომ გაერთიანებულ სამეფოსთან შეთანხმება უკვე გაფორმდა და ცოტა ხნის წინ, აშშ-ჩინეთის მთავრობები 90 დღით ტარიფების 115 პროცენტული პუნქტით შემცირებაზე შეთანხმდნენ. ამ მოცემულობის გათვალისწინებით, არსებობს საფუძვლიანი მოლოდინი, რომ „სავაჭრო ომი“ დასრულდება და ბაზარზე სტაბილური აღმასვლის ეპოქა დაბრუნდება.
ამასთან, გასულ კვირას ინდოეთი და პაკისტანი ცეცხლის შეწყვეტაზე შეთანხმდნენ და არ არის გამორიცხული, მსგავსი გადაწყვეტილება უახლოეს მომავალში რუსეთმა და უკრაინამაც მიიღონ, რაც გეოპოლიტიკური რისკების მნიშვნელოვნად შემცირებას გამოიწვევს და საფონდო ბირჟას ზრდა-განვითარებისთვის დამატებით ბიძგს მისცემს.
გეოპოლიტიკასთან ერთად, არ უნდა დაგვავიწყდეს, რომ მსხვილი კომპანიები ფინანსურ შედეგებს ასაჯაროებენ და ამ მიმართულებით პოზიტიური ტენდენციები შეინიშნება, მაგალითად: Microsoft-ის და Meta-ს შემოსავლები რეკორდულადაა გაზრდილი; Apple-მა დასაკეცი iPhone-ის და ჭკვიანი სათვალის გამოშვება გადაწყვიტა; ხოლო Nvidia-ს შემთხვევაში AI-ჩიპებზე მოთხოვნა იმდენად მაღალია, რომ კომპანია რეკორდული მოგების მიღებას პროგნოზირებს.
საერთო ჯამში, კომპანიების პოზიტიური შედეგების და გეოპოლიტიკური რისკების შემცირების ფონზე, მსოფლიოს მასშტაბით ინვესტორების განწყობა გაუმჯობესებულია, რაც საფონდო ბირჟის ზრდას იწვევს და თუ ფიქრობ, რომ ეს ტენდენცია მომავალშიც გაგრძელდება, მაშინ მობილბანკში შენს მიერ არჩეულ საინვესტიციო სტრატეგიას უნდა მიჰყვე.
მოცემული „ინფორმაცია“ არ წარმოადგენს და ამავდროულად არ შეიძლება აღქმულ იქნას როგორც საინვესტიციო რჩევა, ყიდვის/გაყიდვის ან შუამავლობის შეთავაზება ან რეკომენდაცია ფასიანი ქაღალდების შეძენასთან/ გაყიდვასთან დაკავშირებით.
სხვა სიახლეები
FED-ის მიერ განაკვეთის შემცირების მოლოდინი გაიზარდა
30.08.2025.12:00
ფედერალური რეზერვის ყოველწლიურ „ჯექსონ ჰოულის“ შეკრებაზე თავმჯდომარე ჯერომ პაუელის სიტყვით გამოსვლამ გაზარდა მოლოდინები, რომ „რისკების ცვალებადი ბალანსიდან“ გამომდინარე ცენტრალურმა ბანკმა შესაძლოა სექტემბერში საპროცენტო განაკვეთები შეამციროს.
განცხადებამ აქციებისა და ობლიგაციების ფასების ზრდა გამოიწვია – S&P 500 მაჩვენებელი დღიურად 1.63%-ით გაიზარდა, რაც მაისის შემდეგ ყველაზე დიდი დღიური ზრდაა, ხოლო სახაზინო ფასიანი ქაღალდების შემთხვევაში 10-წლიანი ობლიგაციის შემოსავლიანობა 7.5 საბაზო პუნქტით 4.256%-მდე, 2 წლიანი კი 10 საბაზო პუნქტით 3.69%-მდე შემცირდა.
ფედერალური რეზერვის თავმჯდომარემ, ჯერომ პაუელმა აღნიშნა, რომ აშშ-ის ეკონომიკური სურათი უჩვეულოდ ბუნდოვანია. ერთის მხრივ, უმუშევრობა ისტორიულად დაბალ დონეზე – 4.2%-ზე რჩება, თუმცა დასაქმების ტემპი მნიშვნელოვნად შენელდა – ივლისში 73 000 ახალი სამუშაო ადგილი შეიქმნა, მაშინ როცა მოსალოდნელი რიცხვი 110 000 იყო. პაუელმა შრომის ბაზრის დღევანდელი მდგომარეობა “საინტერესოდ“ შეაფასა, რადგან ერთდროულად იკლებს როგორც სამუშაო ძალის მოთხოვნა, ასევე მიწოდება.
მეორეს მხრივ, ინფლაცია კვლავაც მცირედით აღემატება FED-ის 2%-იან მიზანს, ხოლო პრეზიდენტი ტრამპის მიერ დაწესებული ტარიფები უახლოეს თვეებში ფასების დამატებით ზრდის საფრთხეს ქმნის. მიუხედავად იმისა, რომ კომპანიებმა ჯერჯერობით ზარალის ნაწილი საკუთარ თავზე აიღეს, პაუელმა აღნიშნა, რომ უფრო მდგრადი ფასების ზრდა შესაძლოა უკვე წლის ბოლოსკენ გამოიკვეთოს.
პაუელმა ხაზი გაუსვა FED-ის „ორმაგ მანდატს“ – მაქსიმალური დასაქმება და ფასების სტაბილურობის უზრუნველყოფა. ივლისში განაკვეთის უცვლელად დატოვების გადაწყვეტილებას უკვე მოჰყვა განსხვავებული აზრები, ხოლო პაუელმა მიანიშნა, რომ სექტემბრის შეხვედრამაც შესაძლოა დებატების ფონზე ჩაიაროს, რადგან ფედერალური რეზერვი განაკვეთის შემცირებასა და ინფლაციის რისკს შორის ბალანსს ეძებს.
ფინანსურმა ბაზრებმა პაუელის კომენტარები პოზიტიურად მიიღეს. ინვესტორებმა მისი განცხადებები სექტემბერში განაკვეთის შემცირების პირდაპირ მინიშნებად შეაფასეს. თუმცა ძირითადი მესიჯი უფრო ფრთხილი იყო: FED-ის არჩევანი კვლავ გაურკვეველია და ყოველი მომდევნო ნაბიჯი ეკონომიკურ მონაცემებზე იქნება დამოკიდებული.
პაუელის სიტყვას პოლიტიკური ელფერიც ჰქონდა. მისი უფლებამოსილების ვადა მომავალ წელს იწურება, ამასთანავე თეთრი სახლი FED-ის საბჭოში ახალ კანდიდატურებს აწინაურებს, რაც ანალიტიკოსების აზრით ინსტიტუტის მომავალ დამოუკიდებლობას ეჭვქვეშ აყენებს.
პაუელმა ხაზი გაუსვა, რომ ცენტრალური ბანკის ქმედებები მხოლოდ ეკონომიკურ მონაცემებზე იქნება დამყარებული და არა პოლიტიკურ ზეწოლაზე.
განხილულთაგან ერთ-ერთი ყველაზე მნიშვნელოვანი საკითხი შეეხებოდა ფედერალური რეზერვის განახლებულ სტრატეგიას. FED-მა უარი თქვა 2020 წელს მიღებულ „გამოსწორების სტრატეგიაზე“, რომელიც მიზნად ისახავდა ინფლაციის გარკვეული ხნით 2%-იან მაჩვენებელს ზემოთ შენარჩუნებას. ახალი მიდგომა ისევ ტრადიციულ ორიენტაციას უბრუნდება: მაქსიმალური დასაქმება და ფასების სტაბილურობა. ეს ცვლილება ბოლო ხუთი წლის განმავლობაში დაგროვილი გამოცდილებიდან გამომდინარეობს, როდესაც ინფლაცია ხშირად მაღალი იყო და ეკონომიკური ზრდა — მერყევი. შედეგად, პოლიტიკის შემქმნელ პირებს უფრო მკაფიო მიმართულებები მიეცათ მომავალი გადაწყვეტილებების მისაღებად.