ვიმედოვნებ, ნოემბერში ორ კარგ მატჩს ჩავატარებთ, რათა გავაგრძელოთ ჩვენი დონის ამაღლება - ვილი სანიოლი
საქართველოს ნაკრები წლის დაკსვნითი მატჩებისთვის მზადებას 11 ნოემბერს დაიწყებს.
8 ნოემბერს, მიხეილ მესხის სახელობის სტადიონზე, საქართველოს ნაკრების მთავარი მწვრთნელის, ვილი სანიოლის და ალექსანდრე იაშვილის ტრადიციული შეკრებისწინა პრესკონფერენცია გაიმართა.
წლის დასკვნით საშინაო მატჩს ნაკრები ბათუმში, 16 ნოემბერს, უკრაინის წინააღმდეგ ჩაატარებს. 19 ნოემბერს, ჩვენი გუნდი ჩეხეთს, ქალაქ ოლომოუცში ესტუმრება.
ვილი სანიოლი (ეროვნული ნაკრების მთავარი მწვრთნელი): "ბოლო რამდენიმე წლის განმავლობაში, ძირითადად უცვლელი ტაქტიკით ვთამაშობთ. ალბანეთთან თამაში გამონაკლისი იყო, ქოჩორაშვილის დისკვალიფიკაციიდან და სხვა გარემოებებიდან გამომდინარე. თუმცა, გრძელვადიან პერსპექტივაში, უნდა შევინარჩუნოთ ჩვენი სათამაშო სტილი და იდენტობა. შესაბამისად, დიდ ცვლილებებს არ უნდა ველოდოთ. ფეხბურთელებმა უნდა იცოდნენ როგორ ვითამაშებთ, როდესაც ნაკრებში მოდიან.
რა თქმა უნდა, იმედგაცრუებული ვიყავი ალბანეთთან მატჩის შემდეგ. თამაშის ჩანაწერი ბევრჯერ ვნახე და ისევ იმ აზრზე ვარ, რომ წაგებას არ ვიმსახურებდით. ახლა ორი რთული მატჩი გველის. უკრაინა და ჩეხეთი ძლიერი გუნდები არიან. ჩვენთვის, ეს არის შესაძლებლობა ვაჩვენოთ, რომ ასეთ ძლიერ ჯგუფში კონკურენტუნარიანი გუნდი ვართ. ბ ლიგა საქართველოსთვის რთული ლიგაა. მართალია, ყველანი კიდევ უფრო დიდ წარმატებებზე ვოცნებობთ, მაგრამ რეალისტები უნდა ვიყოთ და დავაკვირდეთ ჩვენს განვითარებას გრძელვადიან პერსპექტივაში.
ოქტომბრის მატჩების შემდეგ ზურიკო დავითაშვილი ბევრად უკეთეს ფეხბურთს თამაშობს. მეტი თავდაჯერება აქვს და ეჩვევა საფრანგეთის ლიგა 1-ს. კმაყოფილი ვარ მისი თამაშით. მიქაუტაძეს კვლავ რთული პერიოდი აქვს, თუმცა კარგია, რომ ბოლო პერიოდში მეტს თამაშობს. მიქაუტაძე კარგ ფორმაში და თავდაჯერებული გვჭირდება, რადგან ის ჩვენი შეტევის ერთ-ერთი ლიდერია.
მექვაბიშვილი და კვეკვესკირი ეროვნული ნაკრების განუყოფელი ნაწილი არიან. ისინი დაუბრუნდნენ მოედანს ტრავმების შემდეგ და ამით ბედნიერი ვარ. მექვაბიშვილი ყოველთვის საინტერესო მოთამაშე იყო ჩემთვის. მაშინაც კი, როდესაც ჯერ კიდევ დინამო თბილისში თამაშობდა და ნაკრებში სათამაშო პრაქტიკა არ ჰქონდა. კვეკვესკირი განსხვავებული სტილის მოთამაშეა. მას უდიდესი გამოცდილება აქვს. მისი როლი მნიშვნელოვანია ფეხბურთელებთან კომუნიკაციაში და მოტივაციის მხრივ. ამასთან, ის ძალიან მნიშვნელოვანი მოთამაშეა ჩვენთვის. ამავდროულად, სიის მიღმა დარჩნენ ნონიკაშვილი და ალთუნაშვილი. სწორედ ეს არის კონკურენცია, რომელიც საბოლოოდ გუნდს აძლიერებს. ვიმედოვნებ, ნოემბერში ორ კარგ მატჩს ჩავატარებთ, რათა გავაგრძელოთ ჩვენი დონის ამაღლება და მზად ვიყოთ მსოფლიო ჩემპიონატის საკვალიფიკაციო ეტაპისთვის.
გიორგი გულიაშვილი ოქტომბერში პირველად იყო ჩვენთან ერთად. ჩემთვის მნიშვნელოვანი იყო მისი გუნდთან ერთად ნახვა. ვფიქრობ, ბოსნიის ჩემპიონატის და სანაკრებო დონე ამ ეტაპზე განსხვავებულია. ვთხოვე, რომ გააგრძელოს მუშაობა, რომ მისცეს საკუთარ თავს ნაკრებში დაბრუნების შესაძლებლობა. გადაწყვეტილებას, იმის შესახებ ფეხბურთელი ეროვნულ ნაკრებში იქნება თუ ახალგაზრდულში, ყოველთვის მე ვიღებ. თუმცა, ზოგჯერ, როდესაც განსაკუთრებული მნიშვნელობის თამაშია, ვსაუბრობთ და საერთო გადაწყვეტილება მიიღება, რადგან ერთი გუნდი ვართ. საბა გოგლიჩიძე უკვე სერია A-ს ფეხბურთელი და ეროვნული გუნდის წევრია. აუცილებლად ითამაშებს ნოემბრის ერთ მატჩში მაინც. ამავდროულად, მინდა წარმატებები ვუსურვო რამაზ სვანაძეს ახალგაზრდულ ნაკრებთან ერთად. 21-წლამდე ნაკრების დიდ ტურნირზე თამაში უდიდესი გამოცდილებაა სამომავლოდ ეროვნული ნაკრებისთვის. ამიტომ, მნიშვნელოვანია, რომ ასაკობრივმა გუნდებმა დიდ ტურნირებზე ითამაშონ".
ალექსანდრე იაშვილი (სფფ-ის ვიცე-პრეზიდენტი): "ჩვენთვის ძალიან მნიშვნელოვანი, რომ საქართველოს ნაკრები არ თამაშობდეს მხოლოდ თბილისში. ბათუმში თამაშის ძალიან კარგი გამოცდილება გვაქვს. ქართველმა გულშემატკივარმა არაერთხელ დაამტკიცა, რომ უდიდესი ძალა აქვს. დიდი იმედი მაქვს, გულშემატკივარი და გუნდი ერთად შეძლებს წარმატების მიღწევას. ჩვენი სათამაშო სტილიდან გამომდინარე მნიშვნელოვანია, რომ საფარი საუკეთესო მდგომარეობაში იყოს. სწორედ ამიტომ, ბოლო მატჩებში ბათუმი დინამო სხვა სტადიონს იყენებდა. დარწმუნებული ვარ, მინდვრის საფარი ბათუმში საუკეთესო მდგომარეობაში დაგვხვდება.
პირველად საქართველოს ისტორიაში 21-წლამდე ნაკრები პლეი-ოფშია და პირველად გვაქვს შესაძლებლობა ევროპის ჩემპიონატზე თამაშის უფლება სპორტულად მოვიპოვოთ. ყველამ ვნახეთ, რაოდენ საოცარი შეგრძნებაა ევროპის ჩემპიონატზე თამაში. მაყურებლის როლს ძალიან დიდი მნიშვნელობა აქვს. იმედი მაქვს, სტადიონი გაივსება და ფეხბურთელებს სათანადო მხარდაჭერა ექნებათ.
გაბრიელ სიგუა ძალიან მნიშვნელოვანი ფეხბურთელია ჩვენთვის. სწორედ ამიტომ იყო სანაკრებო განაცხადში ევროპის ჩემპიონატზე. სამწუხაროდ, ბოლო პერიოდში ხშირად ჰქონდა ტრავმები, თუმცა ახლა თავს კარგად გრძნობს და დიდი იმედი მაქვს დაეხმარება 21-წლამდე ნაკრებს წარმატების მიღწევაში. იმედი მაქვს, რომ შეძლებს თავი გაართვას ტრავმებს, ახალგაზრდა ფეხბურთელისთვის მნიშვნელოვანია ჯანმრთელად ყოფნა და რაც შეიძლება მეტი თამაში".
სხვა სიახლეები
FED-ის მიერ განაკვეთის შემცირების მოლოდინი გაიზარდა
30.08.2025.12:00
ფედერალური რეზერვის ყოველწლიურ „ჯექსონ ჰოულის“ შეკრებაზე თავმჯდომარე ჯერომ პაუელის სიტყვით გამოსვლამ გაზარდა მოლოდინები, რომ „რისკების ცვალებადი ბალანსიდან“ გამომდინარე ცენტრალურმა ბანკმა შესაძლოა სექტემბერში საპროცენტო განაკვეთები შეამციროს.
განცხადებამ აქციებისა და ობლიგაციების ფასების ზრდა გამოიწვია – S&P 500 მაჩვენებელი დღიურად 1.63%-ით გაიზარდა, რაც მაისის შემდეგ ყველაზე დიდი დღიური ზრდაა, ხოლო სახაზინო ფასიანი ქაღალდების შემთხვევაში 10-წლიანი ობლიგაციის შემოსავლიანობა 7.5 საბაზო პუნქტით 4.256%-მდე, 2 წლიანი კი 10 საბაზო პუნქტით 3.69%-მდე შემცირდა.
ფედერალური რეზერვის თავმჯდომარემ, ჯერომ პაუელმა აღნიშნა, რომ აშშ-ის ეკონომიკური სურათი უჩვეულოდ ბუნდოვანია. ერთის მხრივ, უმუშევრობა ისტორიულად დაბალ დონეზე – 4.2%-ზე რჩება, თუმცა დასაქმების ტემპი მნიშვნელოვნად შენელდა – ივლისში 73 000 ახალი სამუშაო ადგილი შეიქმნა, მაშინ როცა მოსალოდნელი რიცხვი 110 000 იყო. პაუელმა შრომის ბაზრის დღევანდელი მდგომარეობა “საინტერესოდ“ შეაფასა, რადგან ერთდროულად იკლებს როგორც სამუშაო ძალის მოთხოვნა, ასევე მიწოდება.
მეორეს მხრივ, ინფლაცია კვლავაც მცირედით აღემატება FED-ის 2%-იან მიზანს, ხოლო პრეზიდენტი ტრამპის მიერ დაწესებული ტარიფები უახლოეს თვეებში ფასების დამატებით ზრდის საფრთხეს ქმნის. მიუხედავად იმისა, რომ კომპანიებმა ჯერჯერობით ზარალის ნაწილი საკუთარ თავზე აიღეს, პაუელმა აღნიშნა, რომ უფრო მდგრადი ფასების ზრდა შესაძლოა უკვე წლის ბოლოსკენ გამოიკვეთოს.
პაუელმა ხაზი გაუსვა FED-ის „ორმაგ მანდატს“ – მაქსიმალური დასაქმება და ფასების სტაბილურობის უზრუნველყოფა. ივლისში განაკვეთის უცვლელად დატოვების გადაწყვეტილებას უკვე მოჰყვა განსხვავებული აზრები, ხოლო პაუელმა მიანიშნა, რომ სექტემბრის შეხვედრამაც შესაძლოა დებატების ფონზე ჩაიაროს, რადგან ფედერალური რეზერვი განაკვეთის შემცირებასა და ინფლაციის რისკს შორის ბალანსს ეძებს.
ფინანსურმა ბაზრებმა პაუელის კომენტარები პოზიტიურად მიიღეს. ინვესტორებმა მისი განცხადებები სექტემბერში განაკვეთის შემცირების პირდაპირ მინიშნებად შეაფასეს. თუმცა ძირითადი მესიჯი უფრო ფრთხილი იყო: FED-ის არჩევანი კვლავ გაურკვეველია და ყოველი მომდევნო ნაბიჯი ეკონომიკურ მონაცემებზე იქნება დამოკიდებული.
პაუელის სიტყვას პოლიტიკური ელფერიც ჰქონდა. მისი უფლებამოსილების ვადა მომავალ წელს იწურება, ამასთანავე თეთრი სახლი FED-ის საბჭოში ახალ კანდიდატურებს აწინაურებს, რაც ანალიტიკოსების აზრით ინსტიტუტის მომავალ დამოუკიდებლობას ეჭვქვეშ აყენებს.
პაუელმა ხაზი გაუსვა, რომ ცენტრალური ბანკის ქმედებები მხოლოდ ეკონომიკურ მონაცემებზე იქნება დამყარებული და არა პოლიტიკურ ზეწოლაზე.
განხილულთაგან ერთ-ერთი ყველაზე მნიშვნელოვანი საკითხი შეეხებოდა ფედერალური რეზერვის განახლებულ სტრატეგიას. FED-მა უარი თქვა 2020 წელს მიღებულ „გამოსწორების სტრატეგიაზე“, რომელიც მიზნად ისახავდა ინფლაციის გარკვეული ხნით 2%-იან მაჩვენებელს ზემოთ შენარჩუნებას. ახალი მიდგომა ისევ ტრადიციულ ორიენტაციას უბრუნდება: მაქსიმალური დასაქმება და ფასების სტაბილურობა. ეს ცვლილება ბოლო ხუთი წლის განმავლობაში დაგროვილი გამოცდილებიდან გამომდინარეობს, როდესაც ინფლაცია ხშირად მაღალი იყო და ეკონომიკური ზრდა — მერყევი. შედეგად, პოლიტიკის შემქმნელ პირებს უფრო მკაფიო მიმართულებები მიეცათ მომავალი გადაწყვეტილებების მისაღებად.