აზიის განვითარების ბანკმა (ADB) იაპონურ იენში (JPY) დენომინირებული წყლის თემატიკის ობლიგაცია გამოუშვა, რომლის მეშვეობით მოზიდული სახსრები აზიასა და წყნარი ოკეანის რეგიონში მდგრადი სოფლის მეურნეობის, წყლის რესურსების მართვისა და სასურსათო უსაფრთხოების მხარდამჭერი პროექტების დაფინანსებას მოხმარდება. ეს არის ADB-ის პირველი იენში დენომინირებული თემატური ემისია და იენში განხორციელებული ADB-ის მესამე უმსხვილესი ემისია.

20 მილიარდი იენის (126 მილიონი აშშ დოლარის ეკვივალენტი) მოცულობის, 7-წლიანი ობლიგაცია შეიძინა Zenkyoren-მა (სასოფლო-სამეურნეო კოოპერატივების ეროვნული ურთიერთდაზღვევის ფედერაცია), ხოლო გარიგების ორგანიზატორი იყო Daiwa Capital Markets Europe Limited.

„წყლის თემატიკის ეს ობლიგაცია ცხადყოფს ADB-სა და იაპონელ ინვესტორებს შორის პარტნიორობის სიძლიერეს და მობილიზებას უკეთებს კერძო სექტორისთვის კრიტიკულად მნიშვნელოვან დაფინანსებას მედეგი სოფლის მეურნეობისა და წყალმომარაგების სერვისებისთვის, ამავდროულად კი ხელს უწყობს მოწყვლადი თემებისთვის სასურსათო უსაფრთხოების უზრუნველყოფას“, - განაცხადა ADB-ის ხაზინადარმა ტობიას ჰოშკამ.

2021-2025 წლებში ADB-მ წყლის სექტორში 12.7 მილიარდი აშშ დოლარის ოდენობის დაფინანსება გამოყო, რამაც დაახლოებით 63 მილიონ ადამიანს მოუტანა სარგებელი. ADB-ის წყლის მიმართულებით განხორციელებული ინვესტიციები მოიცავს პროექტებს სარწყავი სისტემების მოდერნიზაციის, წყლის რესურსების ინტეგრირებული მართვის, სტიქიური უბედურებების მიმართ მედეგობის, სოფლის მეურნეობის პროდუქტიულობის გაუმჯობესებისა და ინოვაციური ტექნოლოგიების მხარდაჭერის მიზნით. ეს პროექტები ხელს უწყობს სოფლის მეურნეობის მედეგობის გაძლიერებას, სასოფლო-სამეურნეო მიზნებისთვის წყლის ხელმისაწვდომობის გაუმჯობესებას და რეგიონული სასურსათო მიწოდების ჯაჭვების უფრო უსაფრთხო და მდგრად განვითარებას.

ADB არის წამყვანი მრავალმხრივი განვითარების ბანკი, რომელიც აზიასა და წყნარი ოკეანის რეგიონში მდგრად, ინკლუზიურ და მედეგ ზრდას უჭერს მხარს. წევრ ქვეყნებთან და პარტნიორებთან თანამშრომლობით, რათა კომპლექსურ გამოწვევებს ერთობლივად გაუმკლავდეს, ADB ინოვაციურ ფინანსურ ინსტრუმენტებსა და სტრატეგიულ პარტნიორობებს იყენებს ადამიანების ცხოვრების გარდაქმნის, ხარისხიანი ინფრასტრუქტურის შექმნისა და ჩვენი პლანეტის დაცვის მიზნით.