სერბეთში დაახლოებით 800,000 ადამიანი უფრო უსაფრთხო და სუფთა გარემოთი ისარგებლებს, რადგან ევროპის რეკონსტრუქციისა და განვითარების ბანკის (EBRD) და ევროკავშირის (EU) მხარდაჭერით, დასავლეთ ბალკანეთის საინვესტიციო ჩარჩოს (WBIF) მეშვეობით, სერბეთში 17 არასტანდარტული ნაგავსაყრელის დახურვისა და რეაბილიტაციისთვის საჭირო მოსამზადებელი სამუშაოები იწყება. პიროტის, სრემსკა-მიტროვიცისა და ვალევოს რეგიონებში არსებული აღნიშნული არასტანდარტული ნაგავსაყრელების დახურვისა და რეაბილიტაციისთვის მოსამზადებელი სამუშაოები 2.64 მილიონი ევროს ოდენობის ტექნიკური დახმარების გრანტით დაფინანსდება. გრანტი დასავლეთ ბალკანეთის საინვესტიციო ჩარჩოს (WBIF) ორმხრივი დონორების მიერ ფინანსდება. WBIF რეგიონში ინფრასტრუქტურული ინვესტიციების განხორციელების ევროკავშირის მთავარი პლატფორმაა. საგრანტო შეთანხმებას დღეს EBRD-მა და სერბეთის გარემოს დაცვის სამინისტრომ ხელი მოაწერეს.

გრანტი ნაგავსაყრელების დახურვისა და რეაბილიტაციისთვის საჭირო ტექნიკური და სატენდერო დოკუმენტაციის მომზადებას დააფინანსებს. აღნიშნული ნაგავსაყრელები მიმდებარე დასახლებებში ნიადაგის, მიწისქვეშა წყლებისა და ჰაერის ხარისხისთვის მნიშვნელოვან რისკებს ქმნის. ამ ობიექტების დახურვა და რეაბილიტაცია ხელს შეუწყობს დაბინძურების შემცირებას, ნაგავსაყრელის აირების მართვასა და სათბურის აირების ემისიების შემცირებას, ამასთანავე, შექმნის უფრო უსაფრთხო და სუფთა პირობებს იმ თემებისთვის, რომლებიც დიდი ხნის განმავლობაში მოძველებული ნარჩენების განთავსების ობიექტების გავლენას განიცდიდნენ.

ეს პროექტი EBRD-ისა და საფრანგეთის განვითარების სააგენტოს (AFD) მიერ დაფინანსებული უფრო ფართო პროგრამის ნაწილია, რომელიც სერბეთს რეგიონულ დონეზე ევროკავშირის სტანდარტებთან შესაბამისი, თანამედროვე მყარი ნარჩენების მართვის სისტემების განვითარებასა და გადამუშავების მაჩვენებლების ზრდაში ეხმარება. პროგრამა რეგიონული ნარჩენების მართვის ცენტრების შექმნას ითვალისწინებს, რომლებიც არასტანდარტულ ნაგავსაყრელებს ჩაანაცვლებს. მას შემდეგ, რაც აღნიშნული ცენტრები ამოქმედდება და ნარჩენების მიღებას დაიწყებს, ძველი ნაგავსაყრელების დახურვისა და რეაბილიტაციის პროცესი დაიწყება.