იაპონიის ცენტრალური ბანკის მონეტარული პოლიტიკის განმსაზღვრელმა ზოგიერთმა წევრმა საპროცენტო განაკვეთების ზრდის ტემპის დაჩქარებისკენ მოუწოდა, რადგან საბაზისო ინფლაციამ ცენტრალური ბანკის 2%-იან მიზნობრივ მაჩვენებელს მიაღწია. ამის შესახებ ოქტომბრის სხდომაზე გამოთქმული მოსაზრებების შეჯამებიდან ირკვევა, რაც უახლოეს პერიოდში მონეტარული პოლიტიკის გამკაცრების შესაძლებლობას აძლიერებს.

„ცენტრალურმა ბანკმა საპროცენტო განაკვეთის მომდევნო ზრდა ზედმეტი სიფრთხილის გარეშე უნდა განახორციელოს“, - განაცხადა სხდომის ერთ-ერთმა მონაწილემ, რაც დეკემბრის მომდევნო სხდომაზე განაკვეთის შესაძლო ზრდაზე მიანიშნებს.

თუმცა, სამშაბათს გამოქვეყნებული შეჯამების თანახმად, რამდენიმე წევრმა ნაჩქარევი გადაწყვეტილებებისგან თავის შეკავების აუცილებლობაზე მიუთითა, რაც სუსტი სამომხმარებლო აქტივობითა და ხელოვნურ ინტელექტზე მოთხოვნის მდგრადობასთან დაკავშირებული გაურკვევლობით ახსნა. აღნიშნული პოზიციები ცენტრალური ბანკის წევრებს შორის არსებულ აზრთა სხვადასხვაობას წარმოაჩენს, რომელიც საპროცენტო განაკვეთების შემდგომი ზრდის პროცესში შესაძლოა კიდევ უფრო გაღრმავდეს.

ცენტრალური ბანკის კიდევ ორმა წევრმა მხარი დაუჭირა მონეტარული პოლიტიკის განაკვეთის უახლოეს პერიოდში ეკონომიკისთვის ნეიტრალურ დონემდე გაზრდას.

შეჯამების თანახმად, ერთ-ერთმა წევრმა აღნიშნა, რომ იაპონიის ცენტრალურმა ბანკმა საპროცენტო განაკვეთის ყოველი ზრდის შემდეგ რამდენიმე თვის განმავლობაში ფინანსური პირობები უნდა შეაფასოს და შემდგომი გადაწყვეტილებები ამ შეფასების საფუძველზე მიიღოს.