მასატო კანდა ADB-ის პრეზიდენტად მეორე ხუთწლიანი ვადით აირჩიეს

მსოფლიო

საიმედო ელექტრომომარაგება ერთ-ერთი ყველაზე ფუნდამენტური ვალდებულებაა, რომელიც თანამედროვე ეკონომიკამ საკუთარი მოსახლეობის წინაშე უნდა შეასრულოს - ADB-ის პრეზიდენტი

20.10.2026.13:00

აზიის განვითარების ბანკის (ADB) პრეზიდენტი მასატო კანდა უზბეკეთის ვიცე-პრემიერსა და ეკონომიკისა და ფინანსთა მინისტრს შეხვდა. შეხვედრის ფარგლებში მხარეებმა 200 მილიონი აშშ დოლარის სასესხო შეთანხმება გააფორმეს, რომელიც ქვეყნის ელექტროენერგიის განაწილების სისტემის მოდერნიზაციას, ელექტროენერგიის დანაკარგების შემცირებასა და მზარდი მოთხოვნის პირობებში ელექტრომომარაგების საიმედოობის გაუმჯობესებას ისახავს მიზნად.

„საიმედო ელექტრომომარაგება ერთ-ერთი ყველაზე ფუნდამენტური ვალდებულებაა, რომელიც თანამედროვე ეკონომიკამ საკუთარი მოსახლეობის წინაშე უნდა შეასრულოს. ეს შეთანხმება უზბეკეთს დაეხმარება აღნიშნული ვალდებულების შესრულებაში ელექტროენერგიაზე მოთხოვნის ზრდის პირობებში, უფრო ძლიერი ქსელების განვითარებით, რომლებიც მოემსახურება ოჯახებს, ბიზნესებსა და საჯარო დაწესებულებებს და უზრუნველყოფს განახლებადი ენერგიის უფრო დიდი მოცულობის ინტეგრირებას“, - განაცხადა მასატო კანდამ.

ელექტროენერგიის განაწილების სისტემების მოდერნიზაციის პროგრამა (Modernization of Electricity Distribution Systems Program) ითვალისწინებს უზბეკეთის მასშტაბით 60 კრიტიკულად მნიშვნელოვანი ელექტროგამანაწილებელი ქვესადგურის განახლებასა და ქსელის მართვის გასაუმჯობესებლად ციფრული სისტემების დანერგვას.

აღნიშნული პროგრამა ADB-ის პირველი ენერგეტიკული ოპერაციაა ADB-ისა და მსოფლიო ბანკის სრული ურთიერთნდობის ჩარჩოს (Full Mutual Reliance Framework) ფარგლებში. ამასთან, ეს არის უზბეკეთის ენერგეტიკის სექტორში შედეგებზე დაფუძნებული დაკრედიტების პირველი ოპერაცია.

უზბეკეთის ელექტროენერგეტიკული ქსელი მზარდი დატვირთვის წინაშე დგას, რასაც ეკონომიკის გაფართოება, ქალაქების ზრდა და შინამეურნეობების მხრიდან ელექტროენერგიის მოხმარების მატება განაპირობებს.

მოსალოდნელია, რომ ინვესტიციები ხელს შეუწყობს ელექტროენერგიის დანაკარგებისა და ტრანსფორმატორების გადატვირთვის შემცირებას, ელექტრომომარაგების საიმედოობის გაუმჯობესებას, სულ მცირე 3.3 გიგავატი განახლებადი ენერგიის სიმძლავრის ინტეგრირებას, ასევე სათბურის აირების ემისიების შემცირებას წელიწადში თითქმის 23 000 ტონა CO₂-ის ეკვივალენტით.

პროგრამა ეფუძნება ADB-ის მრავალწლიან მხარდაჭერას უზბეკეთის ელექტროენერგიის წარმოების, გადაცემისა და განაწილების სისტემების განვითარების მიმართულებით. 2010 წლიდან ბანკმა ქვეყნის ენერგეტიკის სექტორისთვის 3.4 მილიარდ დოლარზე მეტი დაფინანსება და გარანტიები გამოყო.

პროგრამა ასევე ითვალისწინებს ელექტროენერგიის გადაცემის ეროვნული კომპანიის ტექნიკური კომპეტენციების, მართვის სისტემებისა და ფინანსური კონტროლის მექანიზმების გაძლიერებას. ამასთან, ხელი შეეწყობა თანამშრომელთა პროფესიულ გადამზადებასა და ენერგეტიკის სექტორში ქალთა მონაწილეობის ზრდას.