ლონდონის საფონდო ბირჟის ჯგუფმა (LSEG) ოთხშაბათს განაცხადა, რომ Nvidia-სთან პარტნიორობა დაიწყო, რომლის მიზანია ფინანსურ ინსტიტუტებს ამერიკული ჩიპების მწარმოებლის ტექნოლოგიების გამოყენებით დიდი მოცულობის ისტორიული საბაზრო მონაცემების უფრო სწრაფად და მასშტაბურად დამუშავებისა და ანალიზის შესაძლებლობა მისცეს.

LSEG, რომელიც ლონდონის საფონდო ბირჟას მართავს და მონაცემებისა და ანალიტიკური სერვისების მიმწოდებელია, აქტიურად აფართოებს საკუთარ მომსახურებას მომხმარებელთა მრავალფეროვანი მოთხოვნების დასაკმაყოფილებლად. ამასთან, კომპანია ცდილობს შეინარჩუნოს მონაცემების ლიცენზირებისა და მათზე კონტროლის მექანიზმები იმ პირობებში, როდესაც ხელოვნური ინტელექტი ცვლის ბიზნესის მიერ მონაცემების გამოყენებისა და სავაჭრო ოპერაციების განხორციელების პრაქტიკას.

კომპანიის განცხადებით, ჩატარებულმა ანალიზმა აჩვენა, რომ Nvidia-ს სპეციალიზებული პროცესორების გამოყენებით, მონაცემთა ბაზების დამატებითი ასლების შექმნის გარეშე, შესაძლებელია თითოეული სავაჭრო ტრანზაქციისა და ფასის კოტირების მონაცემების რამდენიმე წამში გაანალიზება.

LSEG-ის შეფასებით, აღნიშნული ტექნოლოგია მნიშვნელოვნად დააჩქარებს კვლევისა და ანალიზის პროცესს და მას რეალურ დროში მონაცემთა დამუშავებასთან დააახლოებს, განსაკუთრებით იმ ფონზე, როდესაც აქციებით ვაჭრობა 24-საათიან რეჟიმზე გადადის.

კომპანიის ინფორმაციით, LSEG-ის Tick History მონაცემთა ბაზა დაახლოებით 110 ტრილიონ ჩანაწერს მოიცავს, რომლებიც 100 მილიონ ფინანსურ ინსტრუმენტს უკავშირდება. მონაცემები 30-წლიან პერიოდს ფარავს და აერთიანებს ინფორმაციას 580 საფონდო ბირჟიდან, სავაჭრო პლატფორმიდან და მონაცემთა სხვა მომწოდებლიდან.