სახელმწიფო დეპარტამენტი 75 ქვეყნისთვის საიმიგრაციო ვიზების დამუშავების პროცესს აჩერებს.

როგორც ტელეკომპანია Fox News-ი აღნიშნავს, ეს გადაწყვეტილება მიზნად ისახავს მკაცრი ზომების გატარებას იმ აპლიკანტების მიმართ, რომლებიც, სავარაუდოდ, „სახელმწიფო კმაყოფაზე“ მყოფი პირები გახდებიან.

სახელმწიფო დეპარტამენტის მემორანდუმი, რომელიც ექსკლუზიურად Fox News Digital-მა მოიპოვა, მოუწოდებს კონსულებს, უარი თქვან საიმიგრაციო ვიზების გაცემაზე არსებული კანონმდებლობის საფუძველზე, სანამ დეპარტამენტი გადახედავს შემოწმებისა და ვეტირების პროცედურებს.

ქვეყნების სიაში შედის სომალი, რუსეთი, ავღანეთი, ბრაზილია, ირანი, ერაყი, ეგვიპტე, ნიგერია, ტაილანდი, იემენი და სხვები.

პაუზა საიმიგრაციო ვიზების გაცემაში 21 იანვარს დაიწყება და გაგრძელდება განუსაზღვრელი ვადით, სანამ დეპარტამენტი ვიზების დამუშავების პროცედურების ხელახალ შეფასებას არ განახორციელებს.

მითითება ავალებს საკონსულო ოფიცრებს, უარი უთხრან ვიზაზე იმ აპლიკანტებს, რომლებიც, სავარაუდოდ, სახელმწიფო შეღავათებზე იქნებიან დამოკიდებულნი. გადაწყვეტილების მიღებისას გათვალისწინებული იქნება ფაქტორთა ფართო სპექტრი, მათ შორის: ჯანმრთელობის მდგომარეობა, ასაკი, ინგლისური ენის ცოდნის დონე, ფინანსები და გრძელვადიანი სამედიცინო მომსახურების პოტენციური საჭიროებაც კი.

„სახელმწიფო დეპარტამენტი გამოიყენებს თავის უფლებამოსილებას, რათა არაშესაფერისად მიიჩნიოს ის პოტენციური მიგრანტები, რომლებიც აშშ-ში სახელმწიფო კმაყოფაზე იქნებიან და ამერიკელი ხალხის გულუხვობას ბოროტად გამოიყენებენ. ამ 75 ქვეყნიდან მიგრაცია დროებით შეჩერდება, სანამ სახელმწიფო დეპარტამენტი გადახედავს საიმიგრაციო პროცედურებს იმ უცხო ქვეყნის მოქალაქეების შემოსვლის აღსაკვეთად, რომლებიც სოციალურ დახმარებასა და სახელმწიფო შეღავათებს გამოიყენებენ“, - ნათქვამია სახელმწიფო დეპარტამენტის პრესსპიკერის, ტომი პიგოტის განცხადებაში.