Starbucks-მა წლიური მოგების პროგნოზი გამოაქვეყნა, რომელიც უოლ-სტრიტის ანალიტიკოსების მოლოდინებს აღემატება. ამასთან, კომპანიამ საკუთარი აქციების გამოსყიდვის 1 მილიარდი დოლარის მოცულობის პროგრამა წარადგინა, რაც მიანიშნებს, რომ Starbucks-ის გენერალური დირექტორის, ბრაიან ნიკოლის მიერ ყავის ქსელის მასშტაბური რესტრუქტურიზაციის გეგმა შედეგების ჩვენებას იწყებს.

მიუხედავად ამისა, კომპანიის აქციების ფასი ძირითადი სავაჭრო სესიის დასრულების შემდეგ დაახლოებით 2%-ით შემცირდა. ამის მიზეზი Starbucks-ის ჩინური ბიზნესის გასხვისება გახდა, რის გამოც კომპანიამ წლიური შემოსავლების შემცირება ივარაუდა.

ფინანსური შედეგების განხილვისას ბრაიან ნიკოლმა ინვესტორებს არაერთხელ განუცხადა, რომ მისი სტრატეგია „Back to Starbucks“ უკვე აღარ წარმოადგენს კომპანიის საქმიანობის გაჯანსაღების გეგმას და ის ზრდის სტრატეგიად გარდაიქმნა. აღნიშნულ ცვლილებას წინ უძღოდა ორწლიანი ღონისძიებები, რომლებიც მენიუს გამარტივებას, პერსონალში ინვესტიციების განხორციელებასა და საოპერაციო პროცესების გაუმჯობესებას მოიცავდა. ამ ნაბიჯების მიზანი მომხმარებელთა ლოდინის დროის შემცირება და მომსახურების ხარისხის გაუმჯობესება იყო.

ინვესტორების ყურადღება სულ უფრო მეტად არის მიმართული იმაზე, შეძლებს თუ არა აღნიშნული ღონისძიებები კომპანიის მომგებიანობის აღდგენას.

Starbucks-ი მოგების მარჟების გაუმჯობესებას რესტრუქტურიზაციის ღონისძიებებით ცდილობს, მათ შორის თანამშრომელთა შემცირებითა და ზოგიერთი ობიექტის დახურვით. ამ გზით კომპანია ცდილობს დააბალანსოს რესტრუქტურიზაციის ფარგლებში პერსონალში განხორციელებული თითქმის 500 მილიონი დოლარის ინვესტიციების გავლენა ხარჯებზე.