ტრამპი კანადას აშშ-თან შეერთების შემთხვევაში გადასახადების დაწევას დაჰპირდა
აშშ-ის არჩეულმა პრეზიდენტმა დონალდ ტრამპმა მის სოციალურ ქსელში შობის დღესასწაული მიულოცა კანადას და დაჰპირდა, რომ გადასახადებს დაწევს, თუ ის ამერიკის 51-ე შტატი გახდება.
თავის საშობაო მილოცვაში ტრამპი კანადის მოქმედ პრემიერ-მინისტრს ჯასტინ ტრიუდოს გუბერნატორად მოიხსენიებს და ამბობს, რომ, თუ კანადა ამერიკის შტატი გახდება, გადასახადები 60%-ით შემცირდება, კანადური ბიზნესის შემოსავლები გაორმაგდება, ხოლო ქვეყანა სამხედრო თვალსაზრისით მსოფლიოში ყველაზე დაცული იქნება.
ტრამპმა აგრეთვე გრენლანდიაც ახსენა და აღნიშნა, რომ ეს კუნძული ამერიკას მისი ეროვნული უსაფრთხოებისთვის სჭირდება. მისი თქმით, გრენლანდიას სურს, რომ აშშ-ის ნაწილი გახდეს.
საშობაო მილოცვაში ტრამპი პანამის არხსაც შეეხო. მისი აზრით, პანამის ხელისუფლება ჩინეთის გავლენის ქვეშ იმყოფება, ხოლო აშშ-ს არხის შენახვას და მის რემონტს აიძულებს. „შობას ვულოცავ ყველა ჩინელ ჯარისკაცს, რომელიც ლამაზად და არალეგალურად ახორციელებს თავის ოპერაციებს პანამის არხში, რომლის მშენებლობისას ჩვენ 38 ათასი ადამიანი დავკარგეთ (110 წლის წინ)“, - აღნიშნა აშშ-ის არჩეულმა პრეზიდენტმა.
სხვა სიახლეები
ეროვნული ბანკის დელეგაცია ეკატერინე გალდავას ხელმძღვანელობით სამხრეთ კორეაში იმყოფებოდა
18.11.2026.11:33
საქართველოს ეროვნული ბანკის ვიცე-პრეზიდენტი ეკატერინე გალდავა, ფინანსური და საზედამხედველო ტექნოლოგიების განვითარების და საგადახდო სისტემების დეპარტამენტების წარმომადგენლებთან ერთად სამუშაო ვიზიტით სამხრეთ კორეის დედაქალაქ სეულში იმყოფებოდა.
ვიზიტი საქართველოს ეროვნულ ბანკსა და კორეის ცენტრალურ ბანკს (Bank of Korea) შორის გაფორმებული ორმხრივი თანამშრომლობის შეთანხმების საფუძველზე, ცოდნის პარტნიორობის პროგრამის (Knowledge Partnership Program - KPP) ფარგლებში განხორციელდა.
საქართველოს ეროვნული ბანკისა და კორეის ცენტრალური ბანკის ერთობლივ პროექტის მიზანი საქართველოში ღია ბანკინგისა და ღია ფინანსების განვითარებისთვის საერთაშორისო გამოცდილების შესწავლა და შესაბამისი რეკომენდაციების შემუშავებაა.
სამუშაო ვიზიტის ფარგლებში საქართველოს ეროვნული ბანკის დელეგაციამ შეხვედრები გამართა კორეის ცენტრალური ბანკის, კორეის საფინანსო სატელეკომუნიკაციო და კლირინგის ინსტიტუტის (Korea Financial Telecommunications and Clearings Institute - KFTC) და სხვა შესაბამისი ორგანიზაციების წარმომადგენლებთან.
შეხვედრებზე მხარეებმა განიხილეს სამხრეთ კორეის გამოცდილება საგადახდო ინფრასტრუქტურის განვითარების, ღია ბანკინგისა და ღია ფინანსების დანერგვის, ინოვაციური საგადახდო მომსახურებებისა და ფინანსურ სექტორში კონკურენციის ხელშეწყობის მიმართულებით. განსაკუთრებული ყურადღება დაეთმო ღია ბანკინგის როლს საგადახდო მომსახურებების განვითარებაში, ალტერნატიული საგადახდო არხების შექმნასა და მომხმარებლებისთვის ფინანსურ მომსახურებებზე ხელმისაწვდომობის გაზრდას.
ეკატერინე გალდავას განცხადებით, საქართველოს ეროვნული ბანკისთვის პრიორიტეტულია თანამედროვე, უსაფრთხო და კონკურენტული საგადახდო ეკოსისტემის განვითარება, რაშიც მნიშვნელოვანი როლი ღია ბანკინგისა და ღია ფინანსების შესაძლებლობების გამოყენებას ენიჭება
„საქართველოს ეროვნული ბანკი აქტიურად მუშაობს ისეთი საგადახდო გარემოს ჩამოყალიბებაზე, რომელიც ხელს შეუწყობს ინოვაციების დანერგვას, კონკურენციის გაძლიერებასა და მომხმარებლებისთვის მრავალფეროვანი ფინანსური მომსახურებების შეთავაზებას. სამხრეთ კორეას ამ მიმართულებით მნიშვნელოვანი გამოცდილება აქვს. ცოდნის პარტნიორობის პროგრამა გვაძლევს შესაძლებლობას, გავეცნოთ პრაქტიკაში დანერგილ გადაწყვეტილებებს და შევაფასოთ მათი გამოყენების პერსპექტივები საქართველოს საგადახდო ბაზარზე“, - აღნიშნა ეკატერინე გალდავამ.
საქართველოს ეროვნული ბანკი განაგრძობს საერთაშორისო პარტნიორებთან თანამშრომლობას და საუკეთესო პრაქტიკის გაზიარებას, რაც ხელს შეუწყობს ქვეყანაში ღია ბანკინგისა და ღია ფინანსების შემდგომ განვითარებას, საგადახდო მომსახურებების ეფექტიანობის ზრდასა და ფინანსური ეკოსისტემის ინოვაციურ ტრანსფორმაციას.