Visa-ს ფინანსურმა შედეგებმა პროგნოზირებულ მაჩვენებელს გადააჭარბა
Visa-ს მეოთხე კვარტლის ფინანსურმა შედეგებმა სამშაბათს ანალიტიკოსების მოლოდინებს გადააჭარბა. მაკროეკონომიკური გაურკვევლობის მიუხედავად, მომხმარებლები კვლავ აქტიურად იყენებდნენ საბანკო ბარათებს მოგზაურობის, საყიდლებისა და რესტორნებში მომსახურების საფასურის გადასახდელად.
მსოფლიოში უმსხვილესი საგადახდო ოპერაციების დამუშავების კომპანიის ფინანსური შედეგები მიუთითებს აშშ-ის ეკონომიკის მდგრადობაზე, მიუხედავად შენარჩუნებული ინფლაციური ზეწოლისა. მომხმარებლები ხარჯვით აქტივობას კვლავ ინარჩუნებენ, რასაც ხელს უწყობს ძლიერი შრომის ბაზარი და ხელფასების ზრდა.
Visa-ს საგადახდო ქსელში განხორციელებული გადახდების მოცულობა, რომელიც მომხმარებლებისა და ბიზნესის ხარჯვით აქტივობას ასახავს, საანგარიშო კვარტალში, მუდმივი დოლარის კურსით გაანგარიშებით, 9%-ით გაიზარდა, ხოლო დამუშავებული ტრანზაქციების რაოდენობამ 10%-ით მოიმატა.
Visa-ს ფართო ციფრული საგადახდო ქსელი, რომელიც მსოფლიოს 200-ზე მეტ ქვეყანასა და ტერიტორიას მოიცავს, კომპანიას ეკონომიკური გაურკვევლობის მიმართ მეტ მდგრადობას ანიჭებს, რადგან მსოფლიოში მილიარდობით ადამიანი ყოველდღიური ხარჯებისა და სხვა შესყიდვების განსახორციელებლად მის საბარათე ქსელს იყენებს.
სხვა სიახლეები
Lufthansa-მ 2026 წლის პროგნოზი შეამცირა - საავიაციო საწვავის ხარჯებმა 9.3 მილიარდ ევროს მიაღწი
13.11.2026.11:00
გერმანულმა ავიაკომპანია Lufthansa-მ სამშაბათს 2026 წლის მოგების პროგნოზი შეამცირა, რადგან კომპანიის შეფასებით, მიმდინარე წელს საავიაციო საწვავის ხარჯები 9.3 მილიარდ ევროს (10.4 მილიარდ აშშ დოლარს) მიაღწევს. ამასთან, კომპანიის მესამე კვარტლის ფინანსური შედეგები პროგნოზებს შეესაბამებოდა, რამაც აქციების ფასის ზრდას შეუწყო ხელი.
ევროპული ავიაკომპანიები აცხადებენ, რომ მიმდინარე კონფლიქტი და საავიაციო საწვავის გაძვირება მათ ფინანსურ პერსპექტივებზე უარყოფითად აისახება. ამასთან, მოსალოდნელია, რომ მომავალ წელს ავიაბილეთების ფასები გაიზრდება, რადგან საწვავის ფასების რისკებისგან დაცვის მოქმედი შეთანხმებების ვადა ამოიწურება.
გერმანული საავიაციო ჯგუფის ინფორმაციით, გასულ წელთან შედარებით, საწვავის ჯამური ხარჯები 400 მილიონ ევროზე მეტით (448 მილიონი აშშ დოლარით) გაიზარდა.