სასტუმრო „ჰოლიდეი ინნ ექსპრესი“ ერთი წელია რაც ადგილობრივ ბაზარზე ოპერირებს. როგორ აფასებს 2023 წელს სასტუმროს მენეჯმენტი და რა მოლოდინები აქვს ტურისტულად მაღალ სეზონზე? ამ და სხვა საკითხებზე Business Insider Georgia სასტუმროს მმართველი კომპანიის, Hotel Collection International-ის რეგიონულ დირექტორ ქეთი მიქაშავიძეს ესაუბრა.
Holiday Inn Express-ი საშუალო კატეგორიის საერთაშორისო ბრენდია შემავალი Intercontinetal Hotel Group-სი (IHG). ამ ტიპის ბრენდები, ლიმიტირებული მომსახურებით, დღეს ყველაზე მზარდი მოთხოვნით გამოირჩევა და სწორედ ამ ტიპის სასტუმროების დეფიციტით ხასიათდება თბილისის ბაზარი.
სასტუმრო 2022 წლის დეკემბერში გავხსენით, და შესაბამისად 2023 წელი ფაქტობრივად პირველი წელი იყო ჩვენი მუშაობის. პირველი წლის შედეგები ზოგადად ბაზრის შესაბამისობაშია, თუმცა ზოგადი მოლოდინი ტურიზმთან მიმართებაში 2023 წელს არ გამართლდა და მოთხოვნა მკვეთრად ნაკლები იყო, ვიდრე ველოდით.
ამის ერთ-ერთი მთავარი მიზეზი მთლიანად რეგიონის პოლიტიკური არასტაბილურობაა და ძირითადი სამიზნე ბაზრებისთვის ჩვენი ქვეყანა, როგორც ჩანს, რისკის შემცველი გახდა ამ წელს.
აღსანიშნავია მოლოდინზე მაღალი მოთხოვნა კორპორაციულ ღონისძიებებზე, რამაც მთელი წლის განმავლობაში დატვირთა ჩვენი მულტიფუნქციური საკონფერენციო დარბაზები.
ვინაიდან პირველი წელი იყო ჩვენთვის 2023 ზრდის შეფასება არ იქნება რელევანტური ამ ეტაპისთვის. ჩვენი სტუმრების გეოგრაფია კი მრავალფეროვანი აღმოჩნდა და მოიცვა ისეთი ქვეყნები, როგორიც არის - ჩინეთი, ინდოეთი, რუსეთი, ისრაელი, ყაზახეთი, სომხეთი, საუდის არაბეთი, აშშ, გერმანია..
განსაკუთრებით გამოსაყოფია ჩინეთი და ინდოეთი როგორც მკვეთრად მზარდი ბაზრები.
ჩვენს ინდუსტრიაში ხშირად ვამბობთ, რომ სასტუმროს წარმატებას განსაზღვრავს პირველ რიგში ლოკაცია. ამ კუთხით, ცხადია, რომ ძალიან მომგებიანი ადგილმდებარეობა გვაქვს - ისტორიულ ცენტრამდე და თბილისის ძირითად ტურისტულ ღირსშესანიშნაობებამდე ფეხით სავალ მანძილზე, თბილისის ერთ-ერთ ძირითად სატრანსპორტო კვანძთან, აეროპორტამდე მოკლე მანძილზე. ეს ყველაფერი ხელს უწყობს როგორც ტურისტული, ასევე ბიზნეს სეგმენტიდან ინტერესს ჩვენს მიმართ. ბრენდის სიძლიერეც ხელს უწყობს სასტუმროს წარმატებას და პოზიციონირებას ბაზარზე და წარმოადგენს ცალსახა კონკურენტულ უპირატესობას დღევანდელ კონკურენტულ გარემოში.
თვითონ ბრენდის თავისებურება - ლიმიტირებული სერვისებით და მოქნილი თანამედროვე ინტერიერის მქონე სივრცეებით, აღმოჩნდა ძალიან მნიშვნელოვანი წარმატებისთვის, რაც გვაძლევს საშუალებას ვუპასუხოთ ბაზარზე არსებულ მოთხოვნას.
2024 წლისთვის მოლოდინი ზომიერია, თუმცა ვიმედოვნებთ, რომ მოთხოვნა ჩვენი ქვეყნის მიმართ მზარდი იქნება. როგორც აღვნიშნეთ, ველოდებით აღმოსავლეთი ქვეყნებიდან სტუმრებს და ასევე ევროპული ბაზრების გააქტიურებას.
ცხადია, რომ მიმდინარე წლის ჯავშნები უკვე გვაქვს, მაღალ სეზონზე გარკვეული პერიოდები სრულადაც არის უკვე დაჯავშნილი სასტუმრო. თბილისის ბაზარი ისტორიულად გამოირჩევა სეზონურობით, შესაბამისად მარტივია მაღალ სეზონზე მუშაობა, მართვის ეფექტურობა კი სწორედ იმაში გამოიხატება თუ როგორ უმკლავდები დაბალ სეზონს, ამისთვის კი ჩვენს სასტუმროში წარმატების ყველა წინაპირობა არსებობს.
უახლესი
