DNT GROUP-მა თბილისის ცენტრში კიდევ ერთი სასტუმრო გახსნა. Hotel Monday უშანგი ჩხეიძის #22 მდებარეობს და 50 სასტუმრო ოთახს აერთიანებს. როგორც Business Insider Georgia-სთან DNT Group-ის თანადამფუძნებელი დავით მესხმა განაცხადა, სასტუმრო საზეიმოდ 9 მარტს გაიხსნება. პროექტი 7 მლნ დოლარის უცხოური ინვესტიციით განხორციელდა.
„Hotel Monday DNT GROUP-ის ახალი პროექტია, რომელიც მოიცავს 50 ნომერს და მდებარეობს თბილისის ერთ-ერთ გამორჩეულ ძველ უბანში, მარჯანიშვილის მოედანთან ახლოს. მისი უნიკალური მდებარეობა სტუმრებს საშუალებას მისცემს დატკბნენ თბილისის მარჯვენა სანაპიროს ლამაზი ხედებით - როგორიცაა მთაწმინდა, ფუნიკულიორი და მდინარე მტკვარი.
ყველა ოთახი გვთავაზობს მშვიდ და სასიამოვნო ატმოსფეროს, კომფორტულ საწოლს, მაღალი ხარისხის თეთრეულს, ყავის და ჩაის გასაკეთებელს კომპლექტს, სწრაფ უფასო WIFI-ს და ყველა იმ ატრიბუტიკას რაც საჭიროა სტუმრის კომფორტისთვის.
სასტუმრო 2024 წლის 9 მარტს საზეიმოდ გავხსნით. პროექტი განხორციელდა უცხოური ინვესტიციით და ჯამური ღირებულება შეადგენს 7 მილიონ დოლარს. სასტუმროში 25 ადამიანია დასაქმებული. სასტუმროში არის 5 სხვადასხვა კატეგორიის ოთახი. სასტუმრო შექმნილია თანამედროვე არქიტექტორული ხედვებითა და საინჟინრო სტანდარტებით, აღჭურვილია უახლესი და თანამედროვე ტექნიკით.
ფუნქციონირებს ლოფტ-ბარი, სადაც სტუმრებს საშუალება ექნებათ დააგემოვნონ, დახვეწილი გემოების ალკოჰოლური და უალკოჰოლო სასმელები“, - აცხადებს DNT Group-ის თანადამფუძნებელი.
დავით მესხის თქმით, სასტუმრო მოიცავს მაღალი სტანდარტებით მოწყობილ სასაუზმე სივრცეს, მიმღებ ჰოლს - სადაც გადანაწილებულია მოსასვენებელი სივრცე, ტერასებს ხედებით მთაწმინდაზე და მყუდრო ეზოს.
„საუზმის კონცეფცია სრულად მორგებულია იმ საერთაშორისო სტანდარტებს, რის მიხედვითაც ხელმძღვანელობენ მაღალი კლასის სასტუმროები; ამავდროულად სტუმრებს საშუალება ექნებათ მიირთვან ქართულ გემოებზე მორგებული კერძები, რაც თავისთავად კარგი საშუალებაა უცხოელი სტუმრებისთვის, რომ გაეცნონ ქართული სუფრის ელემენტებს. ტურისტებს ველოდებით როგორც ევროპული, ისე არაბული ქვეყნებიდან. სასტუმროს ნომრების ფასები იწყება 60 დოლარიდან და ადის 120 დოლარამდე, დამოკიდებული სეზონზე და ნომრის კატეგორიაზე. გვაქვს მოლოდინი, რომ გახსნიდან წლის ბოლომდე გვექნება 60%-იანი დატვირთვა“, - აღნიშნა დავით მესხმა.
DNT GROUP სასტუმროების მენეჯმენტ კომპანიაა, რომელიც ქართულ ბაზარზე 2021 წლიდან ოპერირებს და დაკომპლექტებულია პროფესიონალი მმართველებით. გუნდის თითოეულ წევრს სასტუმროების მართვის მრავალწლიანი გამოცდილება აქვს.
DNT Group მომსახურებებეში შედის: სასტუმროს დაგეგმარება/დეველოპმენტი; სასტუმროს მომზადება გახსნისთვის, სასტუმროს სრული მართვა და აუტსორს-გაყიდვები.
„კომპანიას წლიდან წლამდე აქვს შთამბეჭდავი ზრდის ტემპი, ამჟამად აერთიანებს 7 სასტუმროს, საიდანაც 5 მდებარეობს თბილისში, 1 ყაზბეგში და 1 ქუთაისში. თითოეულ პროექტს ვუდგებით განსაკუთრებულად და აქცენტს ვაკეთებთ სტუმრების კმაყოფილებაზე, სასტუმროების მაღალ დატვირთულობაზე და საუკეთესო ფინანსურ შედეგებზე“, - აღნიშნა დავით მესხმა.
