ჩვენი მისწრაფებები ნატო-სკენ არის შეუქცევადი და არ ექვემდებარება გადახედვას - ნიკოლოზ სამხარაძე

„ჩვენ ვაფასებთ ნატო-ს წევრის - თურქეთის მხარდაჭერას საქართველოს ნატო-ში ინტეგრაციის გზაზე. ჩვენი მისწრაფებები ნატო-სკენ არის შეუქცევადი და არ ექვემდებარება გადახედვას. მე მტკიცედ მწამს, რომ ალიანსი წარმოადგენს უსაფრთხოების ერთადერთ გარანტორს არამხოლოდ საქართველოსთვის, არამედ მთელი სამხრეთ კავკასიისთვის. საქართველო ზედმიწევნით იცავს ნატო-ს პრინციპებს ევრო-ატლანტიკური უსაფრთხოების უზრუნველსაყოფად. სტანდარტებით, ვალდებულებების პირნათლად შესრულებით და პრინციპებისადმი ერთგულებით - საქართველო სრულად თავსებადია ალიანსთან და ჩვენს მიერ ნატო-ს საერთაშორისო მისიებში აქტიურმა და წარმატებულმა მონაწილეობამ ცხადყო, რომ საქართველო არამხოლოდ უსაფრთხოების მიმღები, არამედ გამცემიც არის", - ამის შესახებ საგარეო ურთიერთობათა კომიტეტის თავმჯდომარემ ნიკოლოზ სამხარაძემ, საქართველო-თურქეთი-აზერბაიჯანის საგარეო ურთიერთობათა კომიტეტების ყოველწლიურ სამმხრივ სხდომაზე განაცხადა.

აღნიშნული ფორმატის შეხვედრა ყოველწლიურად ტარდება და სამ ქვეყანას შორის საკანონმდებლო დონეზე არსებულ მნიშვნელოვან პლატფორმას წარმოადგენს, სადაც მხარეებს აქვთ შესაძლებლობა, რომ რეგიონში მიმდინარე პროცესები, სამმხრივი სტრატეგიული პარტნიორობის მნიშვნელოვანი ასპექტები და თანამშრომლობის შემდგომი ნაბიჯები განიხილონ.